“Zelenski nə dediyini bilmir, danışıqları başqası aparmalıdır”

“Zelenski nə dediyini bilmir, danışıqları başqası aparmalıdır”.

“Qafqazinfo” xəbər verir ki, bunu ABŞ Prezidenti Donald Tramp Kanzasda keçiriləcək seçki mitinqinə yola düşməzdən əvvəl Ağ Evin həyətində jurnalistlərin suallarını cavablandırarkən deyib.

Tramp Ukrayna liderinin müharibəni dayandırmaqda maraqlı olmadığını və danışıqlar prosesinə mane olduğunu bildirib.

Zelenskinin ABŞ administrasiyasını tənqid edən bəyanatlarına cavab verən Tramp Ukrayna Prezidentinin reallıqdan uzaq olduğunu vurğulayıb: “Zelenski nə dediyini bilmir. O, bu müharibəni çoxdan həll etməli idi. Əgər vaxtında məni dinləsəydi, çoxdan daha əlverişli şərtlərlə razılaşma əldə olunardı və onun tərəfindən həyatını itirən bir milyon insan hələ də sağ qalardı. Ukrayna bu müharibədə dəhşətli dərəcədə insan itirib, ölkənin kişi əhalisi, demək olar ki, tükənib. Düşünürəm ki, artıq Ukrayna adından danışıqlara rəhbərlik etmək üçün başqa birinin təyin olunmasının vaxtı çatıb”.

Tramp həmçinin əlavə edib ki, ABŞ Ukraynaya böyük həcmdə kəşfiyyat məlumatları və dəstək versə də, qarşılığında heç nə əldə etməyib.

ABŞ Prezidenti noyabr ayında Çinə nəzərdə tutulan səfəri çərçivəsində Rusiya Prezidenti Vladimir Putin və Çin Sədri Si Cinpinlə üçtərəfli görüş keçirməyə hazır olduğunu bəyan edib.

Trampın sözlərinə görə, bu görüşün əsas məqsədi Ukrayna böhranından ziyadə, qlobal nüvə tərksilahı məsələsi olacaq: “Ukraynanın iştirak edib-etməməsindən asılı olmayaraq, mən bu müharibəni dayandırmaq üçün danışıqlar aparacağam. Əgər Pekində Putin və Si Cinpinlə nüvə silahsızlanması üzrə razılıq əldə edə bilsək, bu, dünya üçün çox böyük bir xidmət olar”.