Bioloji Təbabət-İnteqrativ Sağlamlıq Mərkəzinin rəhbəri Elxan Yaqubov: Prezident İlham Əliyev – Güclü dövlətçilik, zəfər və insan amilinə söykənən liderlik

Azərbaycan Respublikasının Prezidenti, Müzəffər Ali Baş Komandan cənab İlham Əliyev müasir Azərbaycanın inkişaf tarixində silinməz iz qoymuş qüdrətli dövlət xadimidir. Onun rəhbərliyi dövründə Azərbaycan siyasi sabitliyə, iqtisadi dayanıqlığa və beynəlxalq nüfuza malik güclü dövlətə çevrilmişdir. Prezident İlham Əliyevin həyata keçirdiyi siyasətin əsasını milli maraqların qorunması, xalqın rifahının yüksəldilməsi və müstəqil dövlətçiliyin möhkəmləndirilməsi təşkil edir.

Prezident İlham Əliyev Ulu Öndər Heydər Əliyevin müəyyən etdiyi strateji xətti dövrün tələblərinə uyğun şəkildə uğurla davam etdirərək Azərbaycanı yeni inkişaf mərhələsinə çıxarmışdır. Enerji təhlükəsizliyi, nəqliyyat-logistika layihələri, regional və qlobal əməkdaşlıq təşəbbüsləri ölkəmizin geosiyasi əhəmiyyətini artırmışdır. Azərbaycan bu gün regionda söz sahibi olan, öz mövqeyini qətiyyətlə müdafiə edən dövlətdir.

Prezident İlham Əliyevin adı Azərbaycan tarixinə Müzəffər Ali Baş Komandan kimi qızıl hərflərlə yazılmışdır. 44 günlük Vətən müharibəsində əldə olunan möhtəşəm Qələbə xalq–lider–ordu birliyinin təntənəsi oldu. Ərazi bütövlüyümüzün bərpası Azərbaycan xalqının milli qürurunu bərpa etdi və dövlətçiliyimizin sarsılmazlığını sübut etdi. 

Dövlət başçısının siyasətində insan amili xüsusi yer tutur. Sosial rifahın yaxşılaşdırılması, əhalinin həssas təbəqələrinə qayğı, regionların balanslı inkişafı prioritet istiqamətlərdəndir. Xüsusilə səhiyyə sahəsinə göstərilən diqqət Prezident İlham Əliyevin humanist siyasətinin bariz nümunəsidir. Son illərdə ölkə üzrə müasir xəstəxanalar, tibb mərkəzləri inşa edilmiş, səhiyyə infrastrukturu əsaslı şəkildə yenilənmişdir. İcbari Tibbi Sığorta sisteminin tətbiqi milyonlarla vətəndaşın keyfiyyətli tibbi xidmətlərə çıxışını təmin etmişdir.

Pandemiya dövründə səhiyyə sisteminin operativ və çevik fəaliyyəti dövlət başçısının bu sahəyə vaxtında və düzgün yatırımlarının nəticəsi oldu. Tibb işçilərinin əməyinə verilən yüksək dəyər, onların sosial müdafiəsinin gücləndirilməsi cəmiyyətdə böyük rəğbətlə qarşılandı.

Prezident İlham Əliyevin siyasətində milli birlik və həmrəylik mühüm yer tutur. 31 Dekabr – Dünya Azərbaycanlılarının Həmrəyliyi Günü bütün dünya azərbaycanlılarını vahid amal ətrafında birləşdirən mühüm bayramdır. Bu birlik Azərbaycanın güc mənbəyidir.

Azərbaycan Respublikasının Prezidenti, Müzəffər Ali Baş Komandan cənab İlham Əliyevi doğum günü və 31 Dekabr – Dünya Azərbaycanlılarının Həmrəyliyi Günü münasibətilə səmimi-qəlbdən təbrik edirik. Cənab Prezidentə möhkəm cansağlığı, uzun ömür, ailə səadəti və Azərbaycan dövlətinin inkişafı naminə həyata keçirdiyi şərəfli fəaliyyətində yeni-yeni uğurlar arzulayırıq. Qoy Sizin rəhbərliyiniz altında müstəqil Azərbaycan daha da qüdrətlənsin, xalqımızın birliyi və həmrəyliyi daim möhkəm olsun.