İş adamı Zaur Abdullayev: Prezident İlham Əliyev – Qətiyyət, dövlətçilik və dünya Azərbaycanlılarının birlik rəmzi

Azərbaycan Respublikasının Prezidenti, Müzəffər Ali Baş Komandan cənab İlham Əliyev müasir Azərbaycan tarixində güclü siyasi iradəsi, prinsipial mövqeyi və milli maraqlara söykənən dövlətçilik xətti ilə seçilən görkəmli liderdir. Onun rəhbərliyi dövründə Azərbaycan müstəqilliyini daha da möhkəmləndirmiş, daxili sabitliyə nail olmuş və beynəlxalq müstəvidə nüfuzlu dövlətə çevrilmişdir. Prezident İlham Əliyevin siyasətinin əsas mahiyyəti güclü dövlət, rifahlı cəmiyyət və milli birlik ideyasına əsaslanır.

Ulu Öndər Heydər Əliyevin formalaşdırdığı müasir Azərbaycan dövlətçilik modeli Prezident İlham Əliyev tərəfindən dövrün tələblərinə uyğun şəkildə uğurla davam etdirilir. Bu siyasi kurs Azərbaycanın suverenliyinin qorunmasına, iqtisadi müstəqilliyinin gücləndirilməsinə və xalqın sosial rifahının yüksəldilməsinə xidmət edir. Enerji strategiyası, beynəlxalq nəqliyyat və logistika layihələri, qeyri-neft sektorunun inkişafı ölkəmizi regionun aparıcı iqtisadi mərkəzlərindən birinə çevirmişdir. Azərbaycan bu gün etibarlı tərəfdaş, sözünə və mövqeyinə sadiq dövlət kimi tanınır.

Prezident İlham Əliyevin daxili siyasətində vətəndaş amili prioritet təşkil edir. Regionların sosial-iqtisadi inkişafı, yeni iş yerlərinin yaradılması, müasir sosial infrastrukturun qurulması dövlət siyasətinin əsas istiqamətlərindəndir. Kənd və şəhərlərdə həyata keçirilən abadlıq-quruculuq işləri, yeni məktəblər, xəstəxanalar və sosial obyektlər xalqın həyat səviyyəsinin yüksəlməsinə xidmət edir. Şəhid ailələrinə və qazilərə göstərilən xüsusi diqqət və qayğı isə Prezident İlham Əliyevin humanist idarəçilik prinsiplərinin bariz nümunəsidir.

Azərbaycan xalqının taleyində dönüş nöqtəsi olan 44 günlük Vətən müharibəsi Prezident İlham Əliyevin liderlik keyfiyyətlərini bütün dünyaya nümayiş etdirdi. Müzəffər Ali Baş Komandanın rəhbərliyi ilə rəşadətli Azərbaycan Ordusu tarixi ədaləti bərpa etdi, işğal altında olan torpaqlarımız azad olundu. Bu Qələbə təkcə hərbi gücün deyil, siyasi qətiyyətin, diplomatik mübarizənin və xalq–lider birliyinin təntənəsi oldu. Prezident İlham Əliyevin beynəlxalq tribunalarda apardığı prinsipial siyasət Azərbaycan həqiqətlərinin dünyaya çatdırılmasında mühüm rol oynadı.

Qələbədən sonra azad edilmiş ərazilərdə aparılan genişmiqyaslı bərpa və quruculuq işləri Prezident İlham Əliyevin gələcəyə yönəlmiş strateji baxışının davamıdır. Qarabağ və Şərqi Zəngəzurda inşa edilən yeni yollar, hava limanları, yaşayış kompleksləri, sosial və mədəni obyektlər bu torpaqlara həyatın qayıdışını təmin edir. “Ağıllı şəhər” və “ağıllı kənd” layihələri Azərbaycanın müasir inkişaf konsepsiyasını əks etdirərək azad edilmiş ərazilərin keyfiyyətcə yeni səviyyədə yenidən qurulduğunu göstərir.

Prezident İlham Əliyevin siyasətində milli birlik və həmrəylik ideyası xüsusi yer tutur. Bu baxımdan 31 Dekabr – Dünya Azərbaycanlılarının Həmrəylik Günü mühüm ictimai-siyasi əhəmiyyət daşıyır. Bu əlamətdar tarix dünyanın müxtəlif ölkələrində yaşayan milyonlarla azərbaycanlını vahid amal – güclü və müstəqil Azərbaycan ideyası ətrafında birləşdirir. Prezident İlham Əliyevin diaspor siyasəti nəticəsində xaricdə yaşayan soydaşlarımız daha təşkilatlanmış şəkildə fəaliyyət göstərir, Azərbaycan həqiqətlərinin beynəlxalq ictimaiyyətə çatdırılmasında fəal rol oynayırlar.

Dünya Azərbaycanlılarının Həmrəylik Günü xüsusilə Vətən müharibəsi zamanı öz real gücünü nümayiş etdirdi. Xaricdə yaşayan azərbaycanlıların bir yumruq kimi birləşməsi, ölkəmizin haqq işini müdafiə etməsi milli həmrəyliyin və Prezident İlham Əliyevin apardığı dövlətçilik siyasətinin məntiqi nəticəsi oldu. Bu birlik bu gün də Azərbaycan dövlətinin güc mənbələrindən biri kimi çıxış edir.

Prezident İlham Əliyevin balanslı və prinsipial xarici siyasəti Azərbaycanın beynəlxalq nüfuzunu daha da artırmışdır. Azərbaycan regionda sülhün, təhlükəsizliyin və əməkdaşlığın təşəbbüskarı kimi çıxış edir və bu mövqeyini ardıcıl şəkildə qoruyur.

Azərbaycan Respublikasının Prezidenti, Müzəffər Ali Baş Komandan cənab İlham Əliyevi doğum günü və 31 Dekabr – Dünya Azərbaycanlılarının Həmrəylik Günü münasibətilə ürəkdən təbrik edirik. Cənab Prezidentə möhkəm cansağlığı, uzun ömür, ailə səadəti və Azərbaycan dövlətinin daha da qüdrətlənməsi naminə apardığı şərəfli fəaliyyətində yeni-yeni uğurlar arzulayırıq. Qoy Sizin rəhbərliyiniz altında müstəqil Azərbaycan daim inkişaf etsin, dünya azərbaycanlılarının birliyi əbədi və sarsılmaz olsun!

Zaur Abdullayev

İş adamı