Trampla bağlı gizli saxlanılan sənədlər - Açıqlandı

ABŞ Ədliyyə Nazirliyi milyarder Ceffri Epşteynin istintaqı ilə bağlı əvvəllər dərc olunmamış üç FTB hesabatını yayımlayıb. Sənədlərdə bir qadının yetkinlik yaşına çatmadığı yaşlarda Donald Tramp tərəfindən zorakılığa məruz qaldığını iddia etdiyi bildirilir.

“Qafqazinfo” xəbər verir ki, nazirliyin açıqlamasına görə, Ceffri Epşteyn haqqında istintaq çərçivəsində 2019-cu ildə hazırlanmış üç FTB müsahibə xülasəsi indiyədək ictimaiyyətə açıqlanmamışdı.

Bildirilib ki, “FTB 302” kimi təqdim edilən bu müsahibə hesabatları yanvar ayında dərc olunmuş milyonlarla səhifəlik Epşteyn sənədlərinə daxil edilməyib.

Rəsmilərin sözlərinə görə, sənədlər əvvəlcə digər materialların təkrarı olduğu düşünülərək, “dublikat” kimi kodlaşdırılıb. Sosial mediada yayılan açıqlamada isə 15 sənədin səhvən “dublikat” kimi qeyd edildiyinin aşkar edildiyi bildirilib.

Qeyd edilib ki, FTB şəxsiyyəti açıqlanmayan qadınla 2019-cu ilin iyul-oktyabr ayları arasında dörd ayrı müsahibə aparıb. Qadın bütün müsahibələrdə Ceffri Epşteyn tərəfindən zorakılığa məruz qaldığını iddia edib.

İkinci müsahibəsində o, Epşteynin onu 13-15 yaşlarında Nyu-Yorka və ya Nyu-Cersiyə apardığını və Donald Trampla tanış etdiyini bildirib. Qadın həmin səfər zamanı Tramp tərəfindən zorakılığa məruz qaldığını iddia edib.

Lakin 2019-cu ilin oktyabrında keçirilən dördüncü müsahibə zamanı qadının FTB agentlərinin suallarına baxmayaraq, Trampla bağlı iddia edilən hadisə barədə əlavə məlumat verməkdən imtina etdiyi qeyd olunub.

Sənədlərdə bu iddiaların təsdiqlənmədiyi vurğulanır.

Qadının təsvir etdiyi hadisələrin 1980-ci illərin əvvəlləri və ortaları arasında baş verdiyi iddia edilsə də, həmin dövrdə Ceffri Epşteyn və Donald Tramp arasında əlaqəyə dair dəqiq qeyd olmadığı bildirilib.

Donald Tramp daha əvvəl Ceffri Epşteynlə hər hansı əlaqəsinin və ya onun cinayət fəaliyyətləri barədə məlumatının olduğunu inkar edib.

FTB-yə verdiyi ilk müsahibədə qadın Epşteyn tərəfindən dayə işi üçün işə götürüldüyünə inandığını, lakin hadisə yerində uşaqların olmadığını və orada zorakılığa məruz qaldığını iddia edib. Müsahibənin xülasəsinə görə, qadın oxşar hadisələrin daha bir neçə dəfə baş verdiyini bildirib.

Şahid həmçinin Epşteynlə bağlı bəzi hadisələrin Cənubi Karolinada baş verdiyini iddia edib. Lakin Epşteynin həmin ştata tez-tez səfər etdiyinə dair məlumat olmadığı qeyd olunub.

Bu iddiaların vaxtının Epşteynə qarşı Floridada yetkinlik yaşına çatmayanlara qarşı cinsi istismarla bağlı istintaqın başlamasından təxminən 20 il əvvələ təsadüf etdiyi bildirilir.

Qeyd edək ki, yeni sənədlərin dərc olunmasından əvvəl Konqresdəki demokratlar Ədliyyə Nazirliyini hesabatları qanunsuz şəkildə gizlətməkdə ittiham etmişdilər.

Kaliforniyadan Demokrat Nümayəndələr Palatasının üzvü Robert Qarsiya ötən həftə bildirmişdi ki, bu, qəbuledilməz və qanunsuzdur: “Baş prokuror Pam Bondi və Prezident bu sənədlərin harada olduğunu izah etməlidirlər”.

Ədliyyə Nazirliyi yanvar ayında yaydığı açıqlamada Epşteyn sənədlərində Donald Tramp haqqında təsdiqlənməmiş və sensasiyalı iddiaların yer aldığını bildirmişdi:

“Bəzi sənədlərdə Prezident Tramp haqqında 2020-ci il seçkilərindən az əvvəl FTB-yə təqdim edilmiş yalan və sensasiyalı iddialar var. Bu iddialar əsassız və yalandır. Əgər onların ən kiçik etibarlılığı belə olsaydı, artıq Trampa qarşı istifadə edilmiş olardı”.