“Uğur777” Klinikasından ŞOK AÇIQLAMA...

“Uğur777” Klinikası haqqında yayılan əsassız məlumatlar – Sahibkar Xəyalə İsmayılovanın təkzibi və hüquqi mövqeyi - MÖVQE.

Son günlər bəzi internet resurslarında və sosial media platformalarında “Uğur777” klinikası və onun rəhbəri İsmayılova Xəyalə Aydın qızı ilə bağlı yayılan informasiyalar geniş ictimaiyyətdə müəyyən suallar doğurub. Lakin yayılan bu məlumatların təhlili və mənbələrin araşdırılması göstərir ki, bu məlumatlar tamamilə qərəzli, əsassız və məqsədli şəkildə həyata keçirilən “qara piar” kampaniyasının bir hissəsidir. Hədəfə alınan şəxs isə ölkədə tanınmış sahibkarlardan biri, uzun illərdir tibb sahəsində vicdanla fəaliyyət göstərən və yüzlərlə insanın sağlamlığını bərpa edən bir peşəkar – Xəyalə İsmayılovadır.

Xəyalə İsmayılova verdiyi müsahibədə yayılan iddiaların tamamilə həqiqəti əks etdirmədiyini bildirib. O, bu cür əsassız və təxribat xarakterli məlumatların məqsədli şəkildə hazırlandığını və bəzi maraqlı dairələr tərəfindən sifarişlə tirajlandığını vurğulayıb. Onun sözlərinə görə, bu, açıq-aşkar “şər və böhtan” kampaniyasından başqa bir şey deyil:“Son vaxtlar mənim adıma və rəhbəri olduğum klinikaya qarşı aparılan kampaniya artıq narahatlıq doğurur. Aydın görünür ki, bəzi şəxslər sifarişli yazılarla mənim və klinikamın nüfuzuna zərbə vurmağa çalışırlar. Bu cür hallar nəinki işgüzar imicimə, eyni zamanda ümumilikdə sahibkarlıq mühitinə mənfi təsir göstərir.”

Bu açıqlamadan da göründüyü kimi, məsələ təkcə bir sahibkarın nüfuzuna toxunmaqla bitmir – ümumilikdə, ölkəmizdə sahibkarlığın inkişafına, iş adamlarının azad fəaliyyətinə qarşı yönəlmiş mənfi tendensiyanın bir nümunəsidir.

Araşdırmalarımız zamanı “Uğur777” klinikasının pasiyentləri ilə birbaşa əlaqə saxlayaraq yayılan məlumatların doğruluğunu yoxlamağa çalışdıq. Müsahibə verdiyimiz vətəndaşların əksəriyyəti klinikanın xidmətlərindən razı qaldıqlarını və göstərilən tibbi xidmətlərin keyfiyyətli və peşəkar şəkildə təşkil edildiyini qeyd etdilər. Xüsusilə də qeyd olundu ki, klinikanın rəhbəri Xəyalə İsmayılova daim pasiyentlərlə şəxsən maraqlanır, onların sağlamlıq vəziyyətini nəzarətdə saxlayır və ən yüksək səviyyədə xidmət göstərməyə çalışır.

Klinikanın təchizatı, tibbi avadanlıqları və həkim heyətinin peşəkarlığı da pasiyentlər tərəfindən yüksək qiymətləndirilir. Bu faktlar isə yayılan dezinformasiyaların arxasında qərəzli niyyətlərin dayandığını bir daha sübut edir.

Bu cür hadisələr bir daha göstərir ki, bəzi jurnalistlər və ya sayt rəhbərləri informasiya yayarkən etik prinsiplərə əməl etmir, araşdırma aparmadan və qarşı tərəfin mövqeyini öyrənmədən qərəzli yazılar dərc edirlər. Xəyalə İsmayılova bu məsələ ilə bağlı haqlı olaraq jurnalist həmkarlarımıza səslənərək bildirib:“Jurnalistika şərəfli peşədir. Lakin araşdırılmamış, qeyri-obyektiv məlumatların yayımlanması bu peşəyə kölgə salır. Hər bir media nümayəndəsi bilməlidir ki, ictimaiyyətə təqdim etdiyi hər bir informasiya obyektiv, təsdiqlənmiş və qərəzsiz olmalıdır. Əks halda bu, yalnız peşəkar nüfuzun itirilməsinə səbəb olar.”

Birmənalı şəkildə demək olar ki, bu cür halların artması həm cəmiyyətin informasiya mühitinə mənfi təsir göstərir, həm də cəmiyyətin mətbuata olan inamını sarsıdır.

Qeyd etmək lazımdır ki, Azərbaycan Respublikasının Cinayət Məcəlləsinin 147 və 148-ci maddələrinə əsasən, şəxsin şərəf və ləyaqətini ləkələyən, işgüzar nüfuzuna xələl gətirən yalan məlumatların kütləvi şəkildə yayılması “böhtan” və “təhqir” kimi qiymətləndirilir. Bu əməllər isə hüquqi məsuliyyət yaradır və müvafiq olaraq cərimə, ictimai işlər, islah işləri və ya azadlıqdan məhrum etmə cəzası ilə nəticələnə bilər.

Xəyalə İsmayılova da bu çərçivədə artıq hüquq-mühafizə orqanlarına müraciət etməyi planlaşdırdığını və məsələni hüquqi müstəviyə çıxarmaq niyyətində olduğunu bildirib:“Qarşı tərəf məsuliyyət daşımalıdır. Mən artıq hüquqi prosedurları başladacağam. Heç kim cəzasız qalmamalıdır. Mənim və müəssisəmin nüfuzunu ləkələməyə çalışanlar qanun qarşısında cavab verməlidirlər.”

Məsələnin digər mühüm tərəfi isə dövlətin sahibkarlara verdiyi dəstək və bu sahədə aparılan islahatlardır. Ölkə başçısı cənab İlham Əliyev dəfələrlə sahibkarların fəaliyyətinə süni maneələrin aradan qaldırılması və onların hüquqlarının qorunması ilə bağlı çağırışlar etmişdir. Dövlət başçısının təşəbbüsü ilə ölkədə sahibkarlıq mühitinin yaxşılaşdırılması istiqamətində mühüm addımlar atılıb.

Belə bir şəraitdə, sahibkarların əsassız şəkildə hədəfə alınması, onların fəaliyyətinə maneə törədilməsi təkcə ayrı-ayrı şəxslərə deyil, ümumilikdə dövlət siyasətinə qarşı yönəlmiş addım kimi qiymətləndirilə bilər.

İsmayılova Xəyalə Aydın qızının rəhbərlik etdiyi “Uğur777” klinikası haqqında yayılan iddialar bir daha göstərdi ki, informasiya təhlükəsizliyi və reputasiya müdafiəsi bu gün sahibkarlıq fəaliyyətinin mühüm bir parçasına çevrilib. Lakin ictimaiyyətin də bu məsələyə həssas və ayıq yanaşması vacibdir. Hər hansı bir iddianı dəyərləndirərkən obyektiv mövqe tutmaq, qarşı tərəfin də fikrini dinləmək və yalnız sonra rəy bildirmək məsuliyyətli vətəndaş mövqeyidir.

Bu hadisə həm də mediaya bir siqnal olmalıdır. Etik prinsiplərə əməl edilməli, araşdırma aparılmadan sensasiya xatirinə yazılar dərc olunmamalıdır. Əks təqdirdə bu, yalnız ictimai inamsızlıq yaradar, jurnalistikanın şərəfli adını sual altına salar.

Son olaraq, sahibkar Xəyalə İsmayılovanın sözləri ilə desək: “Mən bu günə qədər yalnız zəhmətimlə irəli getmişəm, vicdanla işləmişəm. Bu cür böhtanlar nə məni, nə də komanda yoldaşlarımı yolumuzdan döndərə bilməz. Biz yenə də vətəndaşlarımızın sağlamlığı üçün çalışacaq, xidmət göstərəcəyik. Haqq öz yerini tapacaq!”.

Fatimə Ümid