Cavid Abdullayev: İlin sonunadək bir neçə bərpaolunan enerji stansiyası istismara veriləcək - AÇIQLAMA VİDEO

Bakı, 7 sentyabr, AZƏRTAC

Azərbaycanda bərpaolunan enerji mənbələrindən elektrik enerjisi istehsalının artırılması istiqamətində işlər davam etdirilir. 2027-ci ilin sonunadək ümumi gücü təxminən 2 giqavat olan 11 Günəş və külək elektrik stansiyasının istismara verilməsi və şəbəkəyə qoşulması nəzərdə tutulur.

Bu barədə AZƏRTAC-a açıqlamasında Bərpa Olunan Enerji Mənbələri Dövlət Agentliyinin (BOEMDA) direktoru Cavid Abdullayev deyib.

“Biz bərpaolunan enerji mənbələrindən elektrik enerjisi istehsalını üç mərhələdə nəzərdən keçirdik. Birinci mərhələnin 2027-ci ilin sonunda yekunlaşması nəzərdə tutulur. Bu çərçivədə 11 günəş və külək stansiyasının, ümumi həcmi təxminən 2 giqavat olan 11 stansiyanın istismara verilməsi və şəbəkəyə qoşulması nəzərdə tutulur. Bu məsələ ilə bağlı işləri plana uyğun şəkildə davam etdiririk”, – deyə C.Abdullayev bildirib.

Cavid Abdullayev qeyd edib ki, cari ilin sonunadək bir neçə stansiyanın istismara verilməsi gözlənilir.

O, işğaldan azad edilmiş ərazilərdə də bərpaolunan enerji layihələrinin həyata keçirildiyini bildirib. Qarabağ və Şərqi Zəngəzur üçün müvafiq konsepsiya və tədbirlər planı təsdiqlənib və onların icrası davam edir.

“Bir sıra kəndlərdə tikilən fərdi evlərin üzərində günəş panelləri quraşdırılır. Bununla yanaşı, sənaye miqyaslı bərpaolunan enerji stansiyalarının istismarı ilə bağlı da ciddi tədbirlər həyata keçirilir”, – deyə BOEMDA direktoru vurğulayıb.

O bildirib ki, bp şirkəti tərəfindən “Şəfəq” Günəş Elektrik Stansiyasının tikintisi həyata keçirilir. Eyni zamanda, iki 50 meqavat gücündə stansiyanın inşasına başlanılıb.

C.Abdullayev qeyd edib ki, bərpaolunan enerji mənbələrindən istifadənin genişləndirilməsi Azərbaycanın enerji siyasətinin əsas istiqamətlərindən biridir.