Məktəblilərin fiziki və strateji bacarıqlarını inkişaf etdirən layihə həyata keçirilib.

“Bir Kompas, Bir Komanda: Məktəblilərin orienterinq üzrə bacarıqlarının artırılması” qrant layihəsi çərçivəsində şagirdlərin fiziki aktivliyinin artırılması və məkan üzrə düşünmə bacarıqlarının inkişafına yönəlmiş fəaliyyətlər uğurla icra olunub. Layihə eyni zamanda iştirakçılarda komanda işi, qərarvermə və məsuliyyət kimi həyati bacarıqların formalaşdırılmasını hədəfləyib.

Layihəyə 5 müəllim və onların rəhbərlik etdiyi ümumilikdə 50 şagird cəlb olunub və iştirakçılar üçün birgə fəaliyyət və öyrənmə mühiti yaradılıb. Təlim mərhələsində şagirdlərə “orienteering” üzrə əsas anlayışlar təqdim olunub, xəritə ilə işləmə, məkan yönümü və komanda strategiyaları üzrə 3 gün praktik məşğələlər keçirilib.

Təlimlər nəticəsində əldə olunan bacarıqların tətbiqi məqsədilə açıq məkanda komandalararası müsabiqə təşkil edilib. “Bir Kompas, Bir Komanda” adı ilə keçirilən yarış zamanı şagirdlər müxtəlif tapşırıqları yerinə yetirərək həm fiziki hazırlıqlarını, həm də strateji düşünmə bacarıqlarını nümayiş etdiriblər. Nəticələrə əsasən ilk 3 yeri tutan komandalar mükafatlandırılıb.

Layihənin davamlılığını təmin etmək məqsədilə məktəbdə fiziki aktivliyi təşviq edən oyun klubu yaradılıb. Klub çərçivəsində il ərzində şagirdlər üçün komanda işi və məkan düşüncəsini inkişaf etdirən interaktiv məşğələlər təşkil olunub.

Layihənin yekun mərhələsində əldə olunan nəticələrin təqdim ediləcəyi bağlanış tədbiri keçirilib.

Qeyd edək ki, layihə Maral Əmraslanova tərəfindən R.Səfərov adına Qara Nuru kənd tam orta ümumtəhsil məktəbində Azərbaycan Respublikasının Elm və Təhsil Nazirliyinin Təhsildə İnkişaf və İnnovasiyalar üzrə IX Qrant Müsabiqəsi çərçivəsində həyata keçirilib.

Xezertv.info