ARHD.AZ İnformasiya Agentliyinin rəhbəri, beynəlxalq hüquq eksperti, hüquq üzrə fəlsəfə doktoru İsmayıl Zalovun bəyanatı

Son günlər regionda baş verən hadisələr bir daha göstərdi ki, bəzi dövlətlər beynəlxalq hüquqa, dövlətlərin suverenliyinə və regional sabitliyə açıq şəkildə hörmətsizlik nümayiş etdirməkdən çəkinmirlər. Naxçıvan Muxtar Respublikasının istiqamətində terror mahiyyəti daşıyan raket hücumunun həyata keçirilməsi yalnız hərbi təxribat deyil, həm də bütün Azərbaycan xalqına qarşı açıq düşmənçilik aktıdır. Bu hadisə bir daha sübut edir ki, terroru dövlət siyasətinə çevirən qüvvələr regionu gərginliyə sürükləmək niyyətindədir.

Azərbaycan xalqı tarix boyu çox sınaqlardan keçmiş, lakin heç zaman təzyiqlərə boyun əyməmişdir. Bu gün də Azərbaycan dövləti güclü siyasi iradəyə, qüdrətli orduya və milli birliyə malikdir. Kimlərsə düşünürsə ki, Azərbaycanı qorxutmaq, təhdid etmək və ya təxribatlarla geri çəkilməyə məcbur etmək mümkündür – onlar çox ciddi şəkildə yanılırlar.

Azərbaycan Respublikasının Prezidenti, Ali Baş Komandan cənab İlham Əliyevin dediyi kimi:

“Mən onların səfirliyinə gedib başsağlığı vermək üçün öz mövqeyimi bildirdim. Halbuki məndən başqa heç bir dövlət başçısı İranın heç bir səfirliyinə getməyib. Yəni bunu qiymətləndirməmək, bunu yerə vurmaq, özlərini alçaq, nankorlar kimi aparmaq heç kimə şərəf gətirmir. Bu şərəfsizlər, bizə qarşı bu terror aktını törədənlər peşman olacaqlar. Bizim gücümüzü sınamasınlar. Bizim gücümüzü sınamaq istəyənlərin başı “Dəmir yumruq” vasitəsilə yarıldı. Bugünkü hadisə də eyni nəticəni hasil edəcək”.

Bu sözlər Azərbaycan dövlətinin qəti mövqeyini açıq şəkildə ortaya qoyur. Azərbaycan heç vaxt terroru, təxribatı və dövlətimizə qarşı yönəlmiş hər hansı hücumu cavabsız qoymayacaq. Regionda sabitlik istəyən hər bir dövlət bilməlidir ki, Azərbaycan sülh tərəfdarıdır, lakin dövlətimizin təhlükəsizliyi və xalqımızın taleyi məsələsində heç vaxt güzəştə getməyəcək.

Terroru və təxribatı alətə çevirən qüvvələr unutmamalıdır ki, Azərbaycan artıq əvvəlki Azərbaycan deyil. Bu gün Azərbaycan regionun ən güclü dövlətlərindən biridir və onun arxasında dəmir iradə, güclü ordu və milli həmrəylik dayanır.

Naxçıvana qarşı yönəlmiş bu terror xarakterli raket hücumu beynəlxalq hüququn bütün normalarının kobud şəkildə pozulmasıdır və bu məsələ beynəlxalq müstəvidə də ciddi şəkildə qaldırılmalıdır. Dövlətlərin ərazi bütövlüyünə və suverenliyinə qarşı yönəlmiş belə addımlar dünya ictimaiyyəti tərəfindən qətiyyətlə pislənməlidir.

Azərbaycan xalqı əmindir ki, dövlətimiz və Ali Baş Komandanımız hər zaman xalqın təhlükəsizliyini təmin edəcək və ölkəmizə qarşı yönəlmiş hər bir təxribat layiqli cavabını alacaq.

Bu gün Azərbaycan xalqı bir daha birlik və həmrəylik nümayiş etdirərək dövlətinin yanında olduğunu göstərir. Heç bir təxribat, heç bir raket hücumu və heç bir düşmən planı Azərbaycan dövlətini yolundan döndərə bilməz.