Azərbaycanın zəfər yürüşü yeni mərhələdə- -DEPUTAT YAZIR

 Əziz Ələkbərli,
Milli Məclisin deputatı,
Qərbi Azərbaycan icması
İdarə Heyətinin sədri

Müasir Azərbaycan dövlətçiliyinin ən parlaq səhifələri Müzəffər Ali Baş Komandan, qüdrətli dövlət xadimi cənab İlham Əliyevin titanik fəaliyyəti və polad iradəsi ilə yazılır. Onun uzaqgörən rəhbərliyi altında Azərbaycan sadəcə öz ərazi bütövlüyünü bərpa edən bir ölkə deyil, həm də qlobal miqyasda iqtisadi sabitliyin və strateji etimadın simvoluna çevrilmişdir. Cənab Prezidentin hər bir addımı milli maraqların müdafiəsinə, xalqın rifahına və dövlətin sarsılmaz gələcəyinə xidmət edən dahi bir strateqin dühasını əks etdirir. Dünyanın siyasi fırtınalarla boğuşduğu, iqtisadi təməllərin sarsıldığı və qlobal güclərin naməlum mənzillərə can atdığı bir dövrdə, Cənubi Qafqazın ürəyində məhz bu uzaqgörən siyasət sayəsində sarsılmaz bir sabitlik və tərəqqi vahəsi yaranıb. Ölkə başçısının həyata keçirdiyi dərindən düşünülmüş iqtisadi strategiya Azərbaycanı qlobal investisiyalar üçün ən etibarlı limana çevirmiş, milli iqtisadiyyatımızı rəqabətə davamlı və çoxşaxəli bir qüdrət mərkəzi halına gətirmişdir. Məhz bu məqsədyönlü islahatların nəticəsidir ki, bu gün Azərbaycan ən müasir texnologiyaların və qlobal kapitalın cərəyan etdiyi əsas iqtisadi arteriyadır.

Fevralın 9-da Bakıda baş tutan tarixi qəbul — Prezident İlham Əliyevin ABŞ Ticarət Palatasının nəhəng nümayəndə heyətini qəbul etməsi bu titanik fəaliyyətin və dövlətimizi çevirdiyi rifah adasının növbəti təntənəsidir. Bu görüş sübut edir ki, Azərbaycan bu gün beynəlxalq münasibətlər sistemində yalnız bir tərəfdaş deyil, həm də strateji yol xəritəsini müəyyən edən qüdrətli qlobal oyunçudur. Dünyanın "Apple", "Meta", "ExxonMobil" və "J.P. Morgan" kimi iqtisadi nəhənglərinin Bakıya üz tutması, dövlət başçısının onilliklər boyu zərgər dəqiqliyi ilə qurduğu etimadın, şəffaflığın və sarsılmaz daxili sabitliyin ən bariz bəhrəsidir. Dövlət başçısı çıxışı zamanı Azərbaycanın bu yeni iqtisadi yüksəlişini və beynəlxalq əməkdaşlığa verdiyi önəmi xüsusi vurğulayaraq demişdir: “Biz hazırda ikitərəfli əlaqələrin çox ümidverici və fəal olan yeni mərhələsinə qədəm qoyuruq və əlbəttə, ABŞ Vitse-prezidentinin səfəri ərəfəsində sizin nümayəndə heyətinizin gəlişi də olduqca əhəmiyyətlidir”. Bu sözlər Azərbaycanın qlobal iqtisadi sistemə inteqrasiyasının dönməz xarakter daşıdığının ən bariz təsdiqidir.



Cənab Prezidentin fəaliyyəti Azərbaycanı təkcə enerji dəhlizinə deyil, həm də rəqəmsal gələcəyin mərkəzi qovşağına çevirib. Onun uzaqgörən siyasəti sayəsində ölkəmiz bu gün xaos içindəki dünyada sülhün və təhlükəsizliyin qarantı kimi çıxış edir. Azərbaycan regionda hər hansı növ enerji idxalından asılılığı olmayan yeganə lider dövlətdir ki, bu da dövlət başçısının iqtisadi müstəqilliyə verdiyi strateji önəmin nəticəsidir. Görüşdə səslənən fikirlər bir daha təsdiqlədi ki, Azərbaycanla tərəfdaşlıq etmək əslində gələcəyin özünə investisiya etmək deməkdir. Prezident İlham Əliyev tərəfindən imzalanmış Strateji Tərəfdaşlıq Xartiyası və ABŞ-la münasibətlərin Vaşinqtondan Bakıya, Davosdan Nyu-Yorka qədər uzanan yüksələn xətti, müstəqil xarici siyasətin zirvəsi hesab olunmalıdır.

Dünyanın çalxalandığı, sərhədlərin və iqtisadi maraqların yenidən cızıldığı bir vaxtda İlham Əliyev dühası Azərbaycanı bütün kənar neqativ təsirlərdən yüksək məharətlə sığortalayıb. Bakıdan dünyaya yayılan bu enerji — həm 16 ölkəni isidən təbii qazımız, həm də rəqəmsal transformasiya üçün nəzərdə tutulan nəhəng elektrik potensialımız — güclü liderin qurduğu sarsılmaz dövlətin rəmzidir. Kuş Çoksinin başçılıq etdiyi 31 dünya nəhənginin Bakıdakı heyranlığı təsadüfi deyil; bu, iki il öncə COP zirvəsində əsası qoyulan və bu gün süni intellekt sahəsində yeni bir eraya qədəm qoyan Azərbaycanın real gücünə verilən beynəlxalq qiymətdir.

Cənab Prezident İlham Əliyevin vurğuladığı kimi, Azərbaycanın strateji gündəliyi artıq ənənəvi sahələri aşaraq texnoloji intibaha fokuslanıb. Bu gün Azərbaycan xalqı öz Liderinin ətrafında dəmir yumruq kimi birləşərək sabaha daha böyük inamla addımlayır. Çünki hər kəs əmindir ki, bu gəminin sükanı arxasında Azərbaycanı hər bir fırtınadan salamat çıxaran, onu dünyanın ən mötəbər paytaxtlarında ehtiramla qarşılanan və böyük layihələrin mərkəzinə çevirən qüdrətli bir rəhbər dayanır. Bakıdan Vaşinqtona uzanan bu iqtisadi və siyasi körpülər, Azərbaycanın gələcək onilliklərdəki parlaq zəfərlərinin və bitməyən rifahının sarsılmaz təməlidir.