Prezident İlham Əliyev müasir Azərbaycanın qalib lideridir

Məşhur Məmmədov,
Milli Məclisin deputatı

Bu gün müasir Azərbaycan dövlətçiliyinin memarı, xalqın etimadını qazanmış güclü siyasi lider, Prezident İlham Əliyevin ad günüdür. Bu tarix təkcə bir şəxsin ömür yolunun mərhələsi deyil, eyni zamanda Azərbaycanın son onilliklərdə keçdiyi inkişaf, sabitlik və qələbə yolunun simvoludur.
Prezident İlham Əliyevin rəhbərliyi ilə Azərbaycan keyfiyyətcə yeni inkişaf mərhələsinə qədəm qoyub. Dövlət idarəçiliyində ardıcıllıq, milli maraqlara əsaslanan müstəqil xarici siyasət və güclü iqtisadi strategiya ölkəmizi regionun lider dövlətinə çevirib. Xüsusilə enerji diplomatiyası, nəqliyyat-logistika layihələri və beynəlxalq tərəfdaşlıqlar Azərbaycanın qlobal nüfuzunu əhəmiyyətli dərəcədə artırıb.
Dövlət başçısının siyasi iradəsi və qətiyyəti nəticəsində 2020-ci ildə əldə edilən tarixi Zəfər Azərbaycan xalqının milli qürurunu bərpa edərək, 30 ilə yaxın davam edən işğala son qoydu.
Prezident İlham Əliyev öz qətiyyəti, siyasi iradəsi və uzaqgörənliyi ilə qalib sərkərdə kimi adını Azərbaycan tarixinə qızıl hərflərlə yazdırdı. Onun rəhbərliyi ilə formalaşan güclü ordu və dəqiq hərbi strategiya 44 günlük Vətən müharibəsində tarixi Zəfəri təmin etdi. Bu qələbə təkcə hərbi uğur deyil, milli ruhun, dövlət birliyinin və ədalətin təntənəsi oldu. Prezident İlham Əliyev döyüş meydanındakı qətiyyətini diplomatik müstəvidə də uğurla davam etdirərək Azərbaycanın mövqelərini möhkəmləndirdi. İşğaldan azad edilmiş torpaqlarda başlayan genişmiqyaslı quruculuq işləri qalib liderin gələcəyə hesablanmış strategiyasının göstəricisidir. Bu gün Azərbaycan güclü, suveren və qalib dövlət kimi beynəlxalq arenada tanınır.
Qarabağ və Şərqi Zəngəzurda həyata keçirilən genişmiqyaslı bərpa və yenidənqurma işləri Prezident İlham Əliyevin strateji baxışının, uzunmüddətli inkişaf konsepsiyasının bariz nümunəsidir. Bu torpaqlarda qurulan yeni həyat modeli Azərbaycanın gələcəyə inamını daha da gücləndirir.
Prezident İlham Əliyevin siyasətinin mərkəzində hər zaman insan amili dayanır. Sosial rifahın yüksəldilməsi, şəhid ailələri və qazilərə dövlət qayğısı, təhsil və səhiyyə sahəsində aparılan islahatlar bunu açıq şəkildə göstərir. Dövlət başçısının imzaladığı qərarlar və proqramlar vətəndaşların həyat səviyyəsinin yaxşılaşdırılmasına xidmət edir və sosial ədalət prinsipini möhkəmləndirir.
Müasir Azərbaycan güclü orduya, dayanıqlı iqtisadiyyata, müstəqil söz sahibi olan xarici siyasətə malikdir. Bütün bunların əsasında isə Prezident İlham Əliyevin uzaqgörən siyasəti, milli maraqlara söykənən liderlik fəlsəfəsi dayanır.
Prezident İlham Əliyevin ad günü münasibətilə dövlətimizin başçısına möhkəm cansağlığı, uzun ömür və şərəfli fəaliyyətində yeni uğurlar arzulayırıq. Əminik ki, onun rəhbərliyi ilə Azərbaycan daha böyük hədəflərə doğru inamla irəliləyəcək, qalib və qüdrətli dövlət kimi mövqeyini daha da möhkəmləndirəcək.