Parlament seçkiləri ölkəmizdə yeni mərhələyə təkan verəcək

2020-ci ilin sentyabrın 27-də başlayan Vətən müharibəsi 44 gündən sonra Azərbaycanın tarixi qələbəsi ilə başa çatdı. 2023-cü il sentyabrın 20-də lokal xarakterli antiterror tədbirləri isə ərazi bütövlüyümüzün və suverenliyimizin tam bərpası prosesini tamamladı. 44 günlük Vətən Müharibəsi nəticəsində qazanılmış şanlı zəfər Azərbaycan dövləti və xalqı üçün müstəqillik tarixində yeni inkişaf mərhələsi başlatdı. Azərbaycanın ərazi bütövlüyü və suverenliyinin təmin olunması fonunda ölkəmizin tarixində yaşanan ilklərin şahidi olmaqdan qürür duyuruq. Bu il ilk dəfə olaraq bütün ölkə ərazisindən prezident seçkilərinin keçirilməsi qızıl həriflərlə tarixə yazıldı. Cənab Prezident İlham Əliyevə xalqın səs verməsi, aparılan siyasətə verilən yüksək qiymətin nəticəsi, demokratyanın əsas gösdəricisi oldu. Ölkə ərazisində keçirilmiş ilk prezident seçkilərindən sonra Azərbaycanda yeni dövrün tələbinə uyğun parlamentin formalaşdırılması tarixi-siyasi zərurətə çevrildi. Xalqın inamı, iradəsi və dəstəyi parlament seçkilərində də özünü göstərməkdədir. Müstəqillik tariximizdə ilk dəfə olaraq parlament seçkiləri Qarabağ və Zəngəzur da daxil omaqla bütöv Azərbaycanı əhatələyəcək. Bu seçkilər hər bir seçicinin yaddaşında ərazi bütövlüyümüzün və suverenliyimizin təntənəsi kimi qalacaq.

İnanırıq ki, deputat kürsüsündə əyləşən layiqli namizədlər fəaliyyətləri boyu xalqın, seçicilərin, döv­lətin ümumi prinsiplərinə yaxından dəstək olacaq, qarşıya qoyulan hədəflərə doğru əhəmiyyətli addımlar atacaqlar.

biologiya elmləri doktoru, professor Səyyarə İbadullayeva