Ədliyyə naziri Fərid Əhmədov Pakistan İslam Respublikasının ölkəmizdəki fövqəladə və səlahiyyətli səfiri Bilal Haye ilə görüşüb.

Görüşdə Azərbaycanla Pakistan arasında strateji tərəfdaşlıq səviyyəsində əməkdaşlıqdan razılıq ifadə olunub və ölkələr arasında hüquqi sahədə, o cümlədən ekstradisiya və məhkumların verilməsi üzrə sıx əməkdaşlığın mövcud olduğu vurğulanıb. Həmçinin təcrübə və bilik mübadiləsi üçün ikitərəfli əlaqələrin genişləndirilməsi imkanlarının mövcudluğu xüsusi qeyd olunub. Görüşdə bildirilib ki, iki ölkə arasında ədliyyə sahəsində müqavilə-hüquq bazasının daha da genişləndirilməsi gündəmdədir.

Bilal Haye səfirlik ilə Azərbaycan Respublikasının Ədliyyə Nazirliyi arasında yaxşı işgüzar əlaqələrin olduğunu bildirib. Səfir səmimi qəbula görə öz minnətdarlığını ifadə edib və ölkəmizdən xoş təəssüratlarla ayrıldığını, Azərbaycanın daim dostu olaraq qalacağını vurğulayıb.

Nazir diplomata gələcək fəaliyyətində uğurlar arzulayıb.

Qeyd edək ki, görüşdə səfir Bilal Hayeenin köməkçisi Vüsal Hümbətzadə və tərcüməçisi iştirak edib.