BİR XALQIN DƏMİR İRADƏSİ, BİR DÖVLƏTİN BÖYÜK QƏLƏBƏSİ – 8 NOYABR ZƏFƏR GÜNÜ!

Elvin Paşayev

Qax Rayon İcra Hakimiyyətinin başçısı

Tarix xalqların taleyində elə anlar yaradır ki, həmin anlar bir günün, bir ilin deyil, bütöv bir millətin gələcəyinin istiqamətini müəyyənləşdirir. Azərbaycan xalqı da öz tarixinin ən möhtəşəm səhifələrindən birini 8 Noyabr 2020-ci ildə yazdı. Bu gün ölkəmizin hər bir guşəsində qürurla qeyd edilən Zəfər Günü milli dövlətçilik tariximizin ən parlaq hadisələrindən biri, xalqımızın yenilməzliyinin və mübarizə əzminin təcəssümüdür.

Bu Zəfər bir gündə yaranmadı. Onun təməlində illərlə davam edən siyasi mübarizə, dövlət quruculuğu, iqtisadi inkişaf, güclü ordu formalaşdırılması və xalqımızın dəyişməz Vətən sevgisi dayanırdı. Azərbaycan öz torpaqlarının işğal altında qalması ilə heç vaxt barışmadı. Nə qədər zaman keçsə də, Qarabağ sevgisi xalqımızın yaddaşından silinmədi. Hər bir ailədə doğma yurdların həsrəti yaşandı, hər bir azərbaycanlının qəlbində bir gün üçrəngli bayrağımızın həmin torpaqlarda dalğalanacağına inam qorundu.

2020-ci il sentyabrın 27-də başlayan Vətən müharibəsi xalqımızın bu inamını gerçəyə çevirdi. Azərbaycan Ordusu əks-hücum əməliyyatları ilə düşmənə sarsıdıcı zərbələr endirdi, uzun illər işğal altında saxlanılan şəhər və kəndlərimizi bir-birinin ardınca azad etdi. Döyüş meydanında nümayiş etdirilən peşəkarlıq, taktiki üstünlük və misilsiz igidlik dünya hərbi ekspertlərinin də diqqətini cəlb etdi.

Bu mübarizənin siyasi rəhbərliyini həyata keçirən Müzəffər Ali Baş Komandan, cənab Prezident İlham Əliyev öz qətiyyətli mövqeyi ilə Azərbaycan xalqının iradəsini ifadə etdi. Dövlət başçısı müharibənin gedişində həm ölkə daxilində milli həmrəyliyin qorunmasına, həm də beynəlxalq informasiya mübarizəsinin aparılmasına xüsusi diqqət yetirdi. Onun xarici media nümayəndələrinə verdiyi müsahibələr, beynəlxalq platformalardakı çıxışları Azərbaycanın haqlı mövqeyinin dünyaya çatdırılmasında mühüm əhəmiyyət daşıdı.

Prezident İlham Əliyevin rəhbərliyi ilə Azərbaycan öz gücünü yalnız bəyanatlarla deyil, konkret nəticələrlə ortaya qoydu. Bu, dövlətçilik məsuliyyətinin, uzaqgörən siyasi qərarların və milli maraqlara sadiqliyin təntənəsi idi. Azərbaycan xalqı öz rəhbərinin ətrafında sıx birləşərək tarixin ən çətin sınaqlarından birini böyük iradə ilə keçdi.

Vətən müharibəsinin hər günü ayrıca bir qəhrəmanlıq dastanıdır. Cəbrayıl, Füzuli, Zəngilan, Qubadlı, Hadrut və digər yaşayış məntəqələrinin azad edilməsi xalqımızın sevincini daha da artırdı. Hər yeni qələbə cəbhədə döyüşən əsgərlərimizin ruh yüksəkliyini gücləndirir, arxa cəbhədə olan milyonlarla insanın qəlbində qürur hissi yaradırdı. Azərbaycan xalqı həmin günlərdə bir yumruğa çevrilmişdi. Kimisi cəbhədə silahı ilə, kimisi arxa cəbhədə əməyi ilə, kimisi də duaları ilə Vətən mübarizəsinə dəstək verirdi.

Noyabrın 8-də Şuşanın azad edilməsi isə bu mübarizənin taleyində həlledici hadisəyə çevrildi. Azərbaycan əsgərinin göstərdiyi misilsiz cəsarət və hərbi məharət nəticəsində düşmənin alınmaz hesab etdiyi mövqelər fəth edildi. Şuşa yenidən öz sahibinə qovuşdu. Bu xəbər bütün Azərbaycanda böyük sevincə səbəb oldu. İnsanlar küçələrə çıxaraq bayraqlarımızı dalğalandırdı, illərin həsrəti göz yaşlarına qarışan sevincə çevrildi.

Şuşanın azadlığı Azərbaycanın mənəvi qələbəsi idi. Çünki bu şəhər xalqımızın musiqisinin, poeziyasının, tarixi şəxsiyyətlərinin və zəngin mədəniyyətinin beşiyidir. Şuşaya qayıdış milli yaddaşımıza qayıdış demək idi. Bu gün həmin şəhərdə keçirilən beynəlxalq tədbirlər, mədəniyyət festivalları və quruculuq layihələri onun əvvəlki şöhrətinin yenidən bərpa olunduğunu göstərir.

Lakin bu böyük tarixin arxasında ağır itkilər və unudulmaz fədakarlıqlar dayanır. Azərbaycan torpaqlarının azadlığı uğrunda minlərlə igidimiz şəhidlik zirvəsinə ucaldı. Onlar öz həyatlarını Vətənin sabahına qurban verdilər. Bu gün azad səmalarda dalğalanan bayrağımızın hər rəngində, hər qarış torpağımızda onların müqəddəs xatirəsi yaşayır. Şəhidlərimizin valideynləri, həyat yoldaşları və övladları qarşısında hər birimizin mənəvi borcu var. Onların fədakarlığı heç bir zaman unudulmamalıdır.

Döyüşlərdə yaralanan, sağlamlığını itirən qazilərimiz də xalqımızın qəhrəmanlıq salnaməsinin canlı daşıyıcılarıdır. Onların hər biri Azərbaycan tarixinin şərəfli səhifəsidir. Dövlətimizin şəhid ailələrinə və müharibə iştirakçılarına göstərdiyi diqqət və qayğı milli həmrəyliyin mühüm təzahürüdür.

Bu gün Zəfərin nəticələrini azad edilmiş ərazilərimizdə daha aydın görürük. Bir vaxtlar dağıntılar içində qalan şəhərlərimiz yenidən qurulur, kəndlərimiz abadlaşır, müasir infrastruktur yaradılır. Böyük Qayıdış proqramı çərçivəsində keçmiş məcburi köçkünlərin doğma yurdlarına mərhələli şəkildə köçürülməsi həyata keçirilir. İllər boyu həsrətlə gözlənilən bu mənzərə xalqımızın ən böyük arzularından birinin reallaşmasıdır.

Qarabağda yeni həyatın qurulması Azərbaycanın gələcək inkişafına hesablanmış mühüm strateji addımdır. Burada yaradılan iqtisadi imkanlar, müasir yaşayış məkanları, təhsil və səhiyyə infrastrukturu bölgənin yeni inkişaf mərhələsinə qədəm qoyduğunu nümayiş etdirir. Artıq Qarabağ yalnız keçmişin xatirəsi deyil, həm də Azərbaycanın sabahına açılan böyük inkişaf məkanıdır.

Zəfər Günü bizə bir həqiqəti xatırladır: Vətəni sevmək yalnız sözlə deyil, əməl, sədaqət və məsuliyyətlə sübut olunur. Bu gün hər bir vətəndaşın üzərinə düşən vəzifə Azərbaycanın müstəqilliyini, dövlətçiliyini və milli birliyini qorumaq, ölkəmizin inkişafına öz töhfəsini verməkdir. Çünki böyük qələbələr böyük məsuliyyətlər də yaradır.

Azərbaycan xalqı tarix qarşısında öz sözünü dedi. Biz sübut etdik ki, heç bir qüvvə xalqımızın milli iradəsini sındıra bilməz. Bu gün qalib Azərbaycanın vətəndaşı olmaq böyük şərəfdir. Bu şərəfin arxasında isə şəhidlərimizin qanı, əsgərlərimizin qəhrəmanlığı, xalqımızın birliyi və Müzəffər Ali Baş Komandanın qətiyyətli rəhbərliyi dayanır.

8 Noyabr – Zəfər Günü münasibətilə Müzəffər Ali Baş Komandan, cənab Prezident İlham Əliyevi, rəşadətli Azərbaycan Ordusunun şəxsi heyətini, şəhid ailələrini, qazilərimizi, veteranlarımızı və dünyanın müxtəlif ölkələrində yaşayan bütün azərbaycanlıları ürəkdən təbrik edirəm!

Allah Vətən uğrunda canından keçən bütün şəhidlərimizə rəhmət eləsin! Qazilərimizə möhkəm cansağlığı arzulayırıq. Xalqımızın birliyi, dövlətimizin qüdrəti və bayrağımızın əzəməti daim yaşasın!

Zəfərimiz əbədi, birliyimiz sarsılmaz, Azərbaycanımız daim qalib olsun! 8 Noyabr – Zəfər Günümüz mübarək!