Gün boyu enerjili qalmağın - Qaydaları

Yaz ayları bədənin mövsüm dəyişikliyinə uyğunlaşmağa çalışdığı və bu səbəbdən daha həssas olduğu dövr kimi xarakterizə olunur. Mütəxəssislər düzgün qidalanma ilə bu dövrün daha enerjili və sağlam keçməsinin mümkün olduğunu bildirirlər.

“Qafqazinfo” xəbər verir ki, yaz mövsümündə orqanizmin immunitetini güclü saxlamaq üçün balanslı və vitaminlərlə zəngin qidalanma vacibdir.

Mövsümi dəyişikliklər zamanı orqanizmdə yorğunluq, halsızlıq və diqqət problemləri yarana bilər. Bu halların qarşısını almaq üçün antioksidantlarla zəngin qidaların qəbulu tövsiyə olunur. Portağal, naringi, limon və təzə tərəvəzlər immun sistemini dəstəkləyir.

Eyni zamanda, balıq, kətan toxumu və qoz kimi omeqa-3 mənbələri diqqəti artırmağa və yorğunluğu azaltmağa kömək edir. Brüssel kələmi, kök, avokado, yumurta, fındıq və badam da gündəlik qidalanmaya əlavə oluna bilər.

Mütəxəssislər şəkərli desertlər, ağ çörək, tort və peçenye kimi sadə karbohidratların enerji səviyyəsini müvəqqəti artırsa da, daha sonra sürətli enişə səbəb olduğunu bildirir.

Omeqa-3 tərkibli qidalar həm enerji verir, həm də yuxu keyfiyyətini yaxşılaşdırır. Yatmazdan 1–2 saat əvvəl qoz, badam və fındıq kimi yüngül qidaların qəbulu daha rahat yuxuya kömək edə bilər. Kefir və qatıq da həzmi asanlaşdıraraq orqanizmin istirahətini dəstəkləyir.

Yaz aylarında əhval dəyişikliklərinin qarşısını almaq üçün serotonin istehsalını dəstəkləyən qidalar önə çıxır. Yulaf, tünd kakao, qırmızı və bənövşəyi meyvələr bu baxımdan faydalıdır.

Həmçinin yüksək kakao tərkibli şokolad və omeqa-3 ilə zəngin avokado, balıq və qoz-fındıq kimi məhsulların psixoloji vəziyyətə müsbət təsir göstərdiyi qeyd edilir.

İmmunitetin güclü qalması üçün protein, vitamin və antioksidantlarla zəngin qidalanma əsas şərt hesab olunur. Sitrus meyvələri, kivi, nar, çuğundur və armud orqanizmin müdafiə sistemini gücləndirir.

Probiotiklərlə zəngin kefir, qatıq və fermentləşdirilmiş məhsullar isə bağırsaq sağlamlığını dəstəkləyərək immunitetə müsbət təsir göstərir.

Mütəxəssislər yaz aylarında B, C, D vitaminləri ilə yanaşı, sink və selen kimi mineralların da kifayət qədər qəbul edilməsinin vacibliyini bildirirlər. Eyni zamanda, kifayət qədər su içmək və emal olunmuş qidalardan uzaq durmaq tövsiyə olunur.

Yaz mövsümündə balanslı qidalanma həm enerji səviyyəsini yüksəldir, həm də ümumi sağlamlığı qorumağa kömək edir.