“Brent” 107 dollara çatır

Hörmüz boğazında ABŞ və İran arasında artan gərginlik qlobal enerji bazarlarına ciddi təsir göstərib.

“Qafqazinfo” xəbər verir ki, tərəflər arasında qarşılıqlı gəmi saxlama əməliyyatları fonunda neft qiymətləri kəskin yüksəlib.

Beynəlxalq etalon sayılan “Brent” xam neftinin qiyməti cümə səhəri 106 dollar həddini keçib.

Son məlumata görə, bir barel neft 106,80 dollara satılıb ki, bu da əvvəlki bağlanışla müqayisədə təxminən 5 faiz artım deməkdir.

Beləliklə, neft qiymətləri iki həftədən sonra yenidən 100 dollar həddinin üzərinə qalxıb. Enerji bazarlarındakı bu artım fond bazarlarına da mənfi təsir edib – “S&P 500” 0,41 faiz, “Nasdaq” isə 0,89 faiz geriləyib.

Qeyd edək ki, ABŞ Prezidenti Donald Tramp dəniz blokadasının genişləndirildiyini açıqlayıb. O, ABŞ Hərbi Dəniz Qüvvələrinin razılığı olmadan heç bir gəminin boğaza daxil olub-çıxa bilməyəcəyini bildirib və razılaşma əldə edilənə qədər bu marşrutun faktiki olaraq bağlı qalacağını vurğulayıb.

Dünya üzrə neft və qaz daşımalarının təxminən beşdə birinin həyata keçirildiyi Hörmüz boğazında nəqliyyat, demək olar ki, dayanıb. Məlumata görə, son günlərdə bu marşrutdan keçən kommersiya gəmilərinin sayı kəskin azalıb.