Xocavənd sakini: "24 yaşımda çıxdığım doğma yurduma, 58 yaşımda qayıdıram"

"İlk gündən inanırdım ki, doğma yurdumuza qayıdacağam".

Oxu.Az xəbər verir ki, bu sözləri Xocavənd şəhərinə köç edən keçmiş məcburi köçkün Quliyev Ziyadə deyib.

Z.Quliyev qeyd edib ki, o inamını heç vaxt itirməyib və doğma yurd-yuvasına qayıdacağı günü səbirsizliklə gözləyib:

"Biz heç vaxt ümidimizi itirmədik, bilirdik ki, bir gün torpaqlarımıza qayıdacağıq. Oradan çıxanda 24 yaşım var idi, indi isə 58 yaşım var. Bu gün biz doğma Xocavəndimizə qayıdırıq. Bu xoşbəxtliyi bizə yaşatdığı üçün Ali Baş Komandanımıza, müzəffər Ordumuza minnətdarıq. Allah şəhidlərimizə rəhmət eləsin, qazilərimizə cansağlığı versin!" - deyə o qeyd edib.

Qeyd edək ki, Kəlbəcər şəhərinə 27 ailə - 118 nəfər, Xocavənd şəhərinə 41 ailə - 138 nəfər, Cəbrayıl rayonunun Horovlu kəndinə isə 40 ailə - 196 nəfər köçürülür.

Məlik Məlikov