Əsirlikdə olan Kəlbəcər sakini: "Bizə qarşı vəhşiliklər törədən şəxslər məhkəmədə cəzalarını aldılar"

"Kəlbəcərin işğalı zamanı beş nəfərlə birlikdə girov düşmüşəm və 766 gün əsirlikdə qalmışam".

Bu sözləri Oxu.Az-a açıqlamasında Bakıdan Kəlbəcərə köç edən keçmiş məcburi köçkün Xasay Cəfərov deyib.

X.Cəfərov bildirib ki, sonradan onunla girov düşən bəzi xanımlar qaytarılsa da, onu buraxmayıblar:

"Bəziləri öldürüldü və Malıbəyli məzarlığında dəfn edildi. Ulu öndər Heydər Əliyevin qətiyyəti sayəsində əsirlikdən qaytarıldım. Kəlbəcəri heç zaman unutmamışam. Allahdan arzu edirdim ki, gedib torpaqlarımızı görmək mənə qismət olsun. Bakıda yaşamışam. Bu günü səbirsizliklə gözləmişəm. Prezident İlham Əliyev sağ olsun, onun və ordumuzun sayəsində bu anları yaşayırıq".

"Mən girovluqda çox işgəncələr görmüşəm. Bu qayıdış isə mənim üçün təsəllidir. Həm də ona görə xoşbəxtəm ki, bizə qarşı vəhşiliklər törədən şəxslərin bu günlərdə məhkəməsi oldu və onlar layiqli cəzalarını aldılar. Bu günləri bizə yaşatdığı üçün Ali Baş Komandanımıza, müzəffər Ordumuza minnətdarıq. Allah şəhidlərimizə rəhmət eləsin, qazilərimizə cansağlığı versin!" - deyə o bildirib.

Qeyd edək ki, Kəlbəcər şəhərinə 27 ailə - 118 nəfər, Xocavənd şəhərinə 41 ailə - 138 nəfər, Cəbrayıl rayonunun Horovlu kəndinə isə 40 ailə - 196 nəfər köçürülür.

Məlik Məlikov