S.C.Pişəvəri adına Respublika Humanitar Fənlər Gimnaziyası: “Milli-mənəvi dəyərlərimizin yaşadıldığı bir ocaqda görüş”

“Tanınmış şəxsiyyətlər təqvimi” layihəsi çərçivəsində Seyid Cəfər Pişəvəri adına humanitar fənlər gimnaziyası kollektivi muğam sənətinin yaşadıldığı bir ailədə görüş keçirmişdir. Görüşün əsas məqsədi şagirdləri Azərbaycan milli musiqisinin incisi olan muğam sənəti ilə yaxından tanış etmək, bu sənətin ailə mühitində necə qorunub saxlanıldığını və nəsildən-nəslə ötürüldüyünü əyani şəkildə nümayiş etdirmək olmuşdur.

“Xezertv.info” xəbər verir ki, görüş zamanı mərhum xanəndə Vahid Abdullayevin zəngin sənət yolu, muğam ifaçılığı sahəsində qazandığı nüfuz, milli musiqimizin təbliği və yaşadılması istiqamətində gördüyü işlər haqqında ətraflı məlumat verilmişdir. Onun sənətə sonsuz sədaqəti, muğam ənənələrinə bağlılığı və Qarabağ muğam məktəbinin davamçısı kimi fəaliyyəti xüsusi vurğulanmışdır. Bildirilmişdir ki, Azərbaycan Respublikasının Birinci vitse-prezidenti Mehriban Əliyevanın təşəbbüsü ilə “Qarabağ xanəndələri” layihəsində mərhum xanəndə Vahid Abdullayevə də yer ayrılmışdır ki, bu da onun sənətinə verilən yüksək qiymətin göstəricisidir.

Mərhum xanəndə Vahid Abdullayevin həyat yoldaşı, muğam müəllimi Kamilə xanım Abdullayevanın pedaqoji fəaliyyəti haqqında da geniş məlumat verilmişdir. Onun ilk iş yerinin S.C. Pişəvəri adına Humanitar Fənlər Gimnaziyası olduğu, əmək fəaliyyətinə məhz bu təhsil ocağında başladığı qeyd edilmişdir. Uzun illər ərzində yetişdirdiyi şagirdlər milli musiqimizin layiqli davamçıları kimi formalaşmışdır. Eyni zamanda Kamilə xanım Abdullayevanın şagirdlərinin muğam müsabiqələrində qalib olmaları onun pedaqoji fəaliyyətinin uğurlu nəticəsi kimi xüsusi vurğulanmışdır.

Ailənin övladlarının da S.C. Pişəvəri adına Humanitar Fənlər Gimnaziyasının məzunları olduğu diqqətə çatdırılmışdır. Hazırda Leyla Abdullayevanın həmin təhsil müəssisəsində müəllim kimi fəaliyyət göstərdiyi, tədris prosesində fəallığı, şagirdlərlə səmərəli işi və milli mənəvi dəyərlərin aşılanmasında göstərdiyi təşəbbüskarlıq xüsusi qeyd edilmişdir.

Eyni zamanda muğam müsabiqəsinin qalibi və AzTV-nin solisti Valid Abdullayevin ailə ənənəsini uğurla davam etdirdiyi, muğam sənətini yüksək səviyyədə təmsil etdiyi vurğulanmışdır.

Görüş çərçivəsində şagirdlər muğamın tarixi kökləri, ifa ənənələri və ailə mühitində sənətin necə yaşadıldığı barədə canlı söhbətlərdə iştirak etmiş, sənət nümunələrini dinləmiş və muğamın mənəvi dəyər kimi əhəmiyyətini daha dərindən dərk etmişlər. Şagirdlərdə milli kimliyə bağlılıq, mədəni irsimizə hörmət və sənətə maraq hissi daha da güclənmişdir.

Belə görüşlər şagirdlərin milli mənəvi dəyərlərə bağlı ruhda formalaşmasına, muğam sənətinə marağın artmasına və Azərbaycan mədəni irsinin qorunmasına mühüm töhfə verir.