"Yanğınsöndürənlər üç dəqiqə gec gəlsəydilər, sağ çıxmayacaqdıq" - Masazır sakinləri niyə evlərində rahat yaşaya bilmirlər?

Abşeron rayonunun Masazır qəsəbəsi, Əliağa Vahid küçəsində yerləşən çoxmərtəbəli yaşayış binasının bir qrup sakini Baku TV-nin qaynar xəttinə müraciət edib.

Sakinlər bildiriblər ki, bir neçə gün əvvəl binanın elektrik naqilləri keçən şaxtasında güclü yanğın baş verib və bu səbəbdən onlarla insan ölüm təhlükəsi ilə üz-üzə qalıb. Sakinlərin iddiasına görə, təhlükəsizlik tədbirləri ilə bağlı bina rəhbərliyinə dəfələrlə müraciət edilsə də, problemə məhəl qoyan olmayıb.

Ailəsini çətinliklə xilas edən bina sakini yaşadığı qorxu dolu anları belə nəql edib:

"Üç mərtəbə qalmış mənim huşum itdi. Fövqəladə Hallar Nazirliyinin əməkdaşları bir az gec gəlsə idi, camaat bizə kömək etməsə idi, vəziyyət daha pis olardı. Balam deyirdi ki, ata, biz burada ölüb qalarıq. Yoldaşımı səkkizinci mərtəbədə qoyub, uşağı götürüb aşağı düşmüşəm. Axı bunu onların vicdanı da götürməz. Özləri də bilir ki, belə naqil xətti, belə elektrik sistemi, belə lift sistemi olmamalıdır. Hadisə gecə saat 3-də, 4-də baş versəydi, o tüstüdən heç kim sağ çıxa bilməyəcəkdi".

Digər bir sakin isə binanın tikintisindəki ciddi nöqsanlara diqqət çəkib: "Kartondan şaxta düzəldib, üstünə üzlük vurublar. Allah Fövqəladə Hallar Nazirliyinin əməkdaşlarından razı olsun, onlarla fəxr etdim. Onlar üç dəqiqə gec gəlsəydilər, buradan bir nəfər də sağ çıxmayacaqdı. Çünki cəmi 3-4 dəqiqə ərzində alov artıq 10-cu mərtəbəyə çatmışdı".