İş adamı Cəbrayıl Cəbrayılov: Prezident, Müzəffər Ali Baş Komandan İlham Əliyev – Milli birliyin və qələbənin simvolu

Azərbaycan Respublikasının Prezidenti, Müzəffər Ali Baş Komandan cənab İlham Əliyev müasir Azərbaycan tarixində dövlətçilik ənənələrinin qoruyucusu və yeni zəfərlərin müəllifi kimi tanınır. Onun rəhbərliyi altında Azərbaycan sabitlikdən inkişafa, inkişafdan isə qələbəyə doğru ardıcıl və məqsədyönlü yol keçmişdir. Prezident İlham Əliyevin siyasi iradəsi, qətiyyəti və milli maraqlara əsaslanan mövqeyi bu gün Azərbaycanın güclü və söz sahibi dövlətə çevrilməsinin əsas səbəblərindəndir.

Ulu Öndər Heydər Əliyevin müəyyən etdiyi strateji xətt Prezident İlham Əliyev tərəfindən uğurla davam etdirilir. Bu siyasi kursun mahiyyəti güclü dövlət institutlarının formalaşdırılması, iqtisadi müstəqilliyin təmin olunması və xalqın rifahının yüksəldilməsidir. Enerji və nəqliyyat layihələri, regional və beynəlxalq əməkdaşlıq təşəbbüsləri Azərbaycanın iqtisadi təhlükəsizliyini möhkəmləndirməklə yanaşı, ölkəmizi Avrasiya məkanında mühüm strateji mərkəzə çevirmişdir. 

Prezident İlham Əliyevin daxili siyasətində sosial ədalət və vətəndaş rifahı əsas yer tutur. Regionların sosial-iqtisadi inkişaf proqramları çərçivəsində həyata keçirilən layihələr, yeni iş yerlərinin açılması, müasir sosial infrastrukturun qurulması dövlətin insan mərkəzli siyasətinin göstəricisidir. Şəhid ailələrinə və qazilərə göstərilən xüsusi diqqət və qayğı isə Prezidentin həm Ali Baş Komandan, həm də xalqın dərdini anlayan lider kimi mövqeyini nümayiş etdirir. Bu yanaşma cəmiyyətdə milli birliyi və qarşılıqlı etimadı daha da gücləndirir.

Azərbaycan xalqının taleyində dönüş nöqtəsi olan 44 günlük Vətən müharibəsi Prezident İlham Əliyevin liderliyinin ən parlaq nümunəsidir. Müzəffər Ali Baş Komandan kimi onun rəhbərliyi altında rəşadətli Azərbaycan Ordusu tarixi ədaləti bərpa etdi, işğal altındakı torpaqlar azad olundu. Bu Qələbə təkcə hərbi nailiyyət deyil, eyni zamanda milli ruhun, siyasi qətiyyətin və xalq–lider birliyinin təntənəsi idi. İlham Əliyevin beynəlxalq tribunalarda apardığı prinsipial mübarizə də bu zəfərin siyasi və hüquqi əsaslarını möhkəmləndirdi.

Müharibədən sonrakı dövrdə azad edilmiş ərazilərdə aparılan genişmiqyaslı bərpa və quruculuq işləri Prezident İlham Əliyevin strateji baxışının davamıdır. Qarabağ və Şərqi Zəngəzurda inşa olunan yeni yollar, hava limanları, yaşayış massivləri, mədəni və sosial obyektlər həmin bölgələrin qısa müddətdə dirçələcəyini göstərir. “Ağıllı şəhər” və “ağıllı kənd” konsepsiyaları isə bu torpaqların müasir inkişaf modelinə uyğun şəkildə yenidən qurulduğunu sübut edir.

Prezident İlham Əliyevin fəaliyyətində milli birlik və həmrəylik ideyası xüsusi yer tutur. 31 Dekabr – Dünya Azərbaycanlılarının Həmrəylik Günü bu ideyanın rəmzi ifadəsidir. Bu əlamətdar gün dünyanın müxtəlif ölkələrində yaşayan milyonlarla azərbaycanlını vahid amal – güclü və müstəqil Azərbaycan ətrafında birləşdirir. Prezident İlham Əliyevin diaspor siyasəti nəticəsində xaricdə yaşayan soydaşlarımız daha mütəşəkkil şəkildə fəaliyyət göstərir, Azərbaycan həqiqətlərinin beynəlxalq ictimaiyyətə çatdırılmasında fəal rol oynayırlar.

Dünya Azərbaycanlılarının Həmrəylik Günü Vətən müharibəsi dövründə öz real təcəssümünü tapdı. Xaricdə yaşayan azərbaycanlıların bir yumruq kimi birləşməsi milli həmrəyliyin gücünü bütün dünyaya nümayiş etdirdi. Bu birlik Prezident İlham Əliyevin apardığı milli ideologiyanın və dövlətçilik siyasətinin məntiqi nəticəsidir.

Prezident İlham Əliyevin balanslı xarici siyasəti, daxili sabitliyi qoruyan qətiyyətli idarəetməsi və milli maraqlara söykənən mövqeyi Azərbaycanın gələcəyə inamla addımlamasını təmin edir. Bu gün ölkəmiz regionda sülhün, əməkdaşlığın və inkişafın təşəbbüskarı kimi çıxış edir.

Azərbaycan Respublikasının Prezidenti, Müzəffər Ali Baş Komandan cənab İlham Əliyevi doğum günü və 31 Dekabr – Dünya Azərbaycanlılarının Həmrəylik Günü münasibətilə ürəkdən təbrik edirik. Cənab Prezidentə möhkəm cansağlığı, uzun ömür, ailə səadəti və dövlətçilik fəaliyyətində davamlı uğurlar arzulayırıq. Qoy Sizin rəhbərliyiniz altında Azərbaycan dövləti daha da güclənsin, dünya azərbaycanlılarının həmrəyliyi daim sarsılmaz olsun!