Dərin ehtiram və sonsuz təşəkkürlə

Azərbaycan Respublikasının Birinci vitse-prezidenti, Heydər Əliyev Fondunun Prezidenti, ölkəmizin ictimai-siyasi, mədəni və humanitar həyatında misilsiz xidmətləri olan hörmətli Mehriban xanım Əliyevaya dərin hörmət və səmimi təşəkkürümü bildirirəm.

Mehriban xanım Əliyeva Azərbaycan tarixində yalnız yüksək dövlət vəzifəsi daşıyan nüfuzlu şəxsiyyət kimi deyil, eyni zamanda milli-mənəvi dəyərlərimizin qoruyucusu, humanizm ideyalarının daşıyıcısı, xalqına qəlbən bağlı olan böyük bir ziyalı və xeyirxah insan kimi özünəməxsus, əvəzolunmaz yer tutur. Onun çoxşaxəli fəaliyyəti ölkəmizin inkişafına, beynəlxalq nüfuzunun möhkəmlənməsinə və cəmiyyətimizin rifahının yüksəlməsinə mühüm töhfələr vermişdir.

Mehriban xanımın rəhbərliyi ilə Heydər Əliyev Fondu tərəfindən həyata keçirilən saysız-hesabsız layihələr Azərbaycan xalqının sosial problemlərinin həllinə, təhsilin, səhiyyənin, mədəniyyətin və elmin inkişafına xidmət edir. Xüsusilə uşaq evləri, internat məktəbləri, sağlamlıq imkanları məhdud şəxslər, aztəminatlı ailələr üçün görülən işlər onun yüksək insani keyfiyyətlərinin, dərin mərhəmətinin və xalqa olan sonsuz sevgisinin bariz nümunəsidir.

Azərbaycan mədəniyyətinin və milli irsinin qorunması və dünyada təbliği istiqamətində Mehriban xanım Əliyevanın gördüyü işlər xüsusi vurğulanmalıdır. Muğam sənətimizin, milli musiqimizin, tarixi-memarlıq abidələrimizin beynəlxalq səviyyədə tanıdılması onun yorulmaz fəaliyyətinin nəticəsidir. Bu fəaliyyət nəticəsində Azərbaycan mədəniyyəti dünya xalqları arasında daha geniş tanınmış, ölkəmizin zəngin irsi beynəlxalq platformalarda layiqincə təqdim olunmuşdur.

Mehriban xanım Əliyevanın dövlətçilik düşüncəsi, hüquqi islahatlara, insan hüquqlarının qorunmasına, vətəndaş cəmiyyətinin inkişafına verdiyi dəstək də xüsusi əhəmiyyət kəsb edir. Onun təşəbbüsləri hüquqi dövlət quruculuğunun möhkəmlənməsinə, cəmiyyətimizdə ədalət, bərabərlik və sosial məsuliyyət prinsiplərinin güclənməsinə mühüm töhfə verir.

Bir hüquq eksperti və hüquq üzrə fəlsəfə doktoru olaraq xüsusi qeyd etmək istəyirəm ki, Mehriban xanım Əliyevanın fəaliyyəti hüququn yalnız normativ qaydalar toplusu deyil, eyni zamanda insanlara xidmət edən ali dəyər olduğunu bir daha nümayiş etdirir. Onun həyata keçirdiyi layihələrdə insan hüquqları, sosial ədalət və humanizm prinsipləri əsas xətt kimi özünü göstərir.

Mehriban xanım Əliyeva öz yüksək mədəniyyəti, zərifliyi, intellekti və güclü liderlik keyfiyyətləri ilə Azərbaycan qadınının dünyadakı parlaq simvoluna çevrilmişdir. O, öz fəaliyyəti ilə gənc nəsil üçün örnək olmaqla yanaşı, cəmiyyətimizdə qadınların ictimai-siyasi həyatda fəal iştirakına böyük stimul verir.

Bu gün Azərbaycan xalqı Mehriban xanım Əliyevanı yalnız bir dövlət xadimi kimi deyil, həm də xalqın dərdini öz dərdi bilən, sevincini öz sevinci sayan, hər zaman insanlara dayaq olan böyük ürək sahibi kimi tanıyır və sevir.

Bütün bu əvəzsiz xidmətlərinə görə hörmətli Mehriban xanım Əliyevaya dərin minnətdarlığımı bildirir, ona möhkəm cansağlığı, tükənməz enerji və ölkəmiz naminə həyata keçirdiyi ali missiyasında yeni-yeni uğurlar arzulayıram.

Hörmət və ehtiramla,

İsmail Zalov

ARHD.az saytının rəhbəri

Hüquq eksperti

Hüquq üzrə fəlsəfə doktoru