“El-Plastik” MMC-nin rəhbəri Hacı Hülağa Abışov: "Xalqın qəlbində taxt quran Lider Xanım"

Azərbaycan Respublikasının Birinci vitse-prezidenti, Heydər Əliyev Fondunun prezidenti, millət vəkili, xalqının dərin sevgisini və ehtiramını qazanan şəxsiyyət – Mehriban Arif qızı Əliyeva həm siyasi, həm humanitar, həm də mədəni sahələrdə misilsiz xidmətləri ilə Azərbaycan cəmiyyətində xüsusi yer tutur. Onun fəaliyyəti ölkəmizin inkişafına, insan amilinin önə çəkilməsinə, dövlətçilik prinsiplərinin möhkəmləndirilməsinə xidmət edir.
Mehriban xanım Əliyeva yalnız yüksək dövlət vəzifəsində çalışan bir şəxs deyil – o, eyni zamanda Azərbaycan qadınının müdrikliyini, humanistliyini və vətənə bağlılığını təcəssüm etdirən, millətin mənəvi dayağı olan örnək simalardandır. Onun fəaliyyəti hər bir sahəyə dərinliklə və sistemli yanaşma, humanizm və vətən sevgisi ilə müşayiət olunur. Bu, təsadüfi deyil. Mehriban xanımın liderlik keyfiyyətləri, geniş dünyagörüşü, mədəni irsə və insani dəyərlərə sadiqliyi onu təkcə Azərbaycanın deyil, həm də beynəlxalq aləmin tanınmış və hörmət edilən qadın siyasi xadimlərindən birinə çevirib.

 
Heydər Əliyev Fondunun rəhbəri kimi onun gördüyü işlər təkcə paytaxtda deyil, Azərbaycanın bütün bölgələrində hiss olunur. Bu Fondun təşəbbüsü ilə minlərlə məktəb, uşaq bağçası, xəstəxana, mədəniyyət ocağı tikilmiş və ya əsaslı təmir olunmuş, qaçqın və məcburi köçkünlərə sosial dəstək göstərilmişdir. Mehriban xanımın təşəbbüsü ilə təhsil, səhiyyə və mədəniyyət sahəsində həyata keçirilən layihələr, cəmiyyətimizin rifahına yönəlmiş addımlar dövlətin sosial siyasətinə güclü dəstək verir.
Mehriban Əliyeva Azərbaycan mədəniyyətinin dünyada tanıdılmasına da mühüm töhfələr verib. Onun təşəbbüsü və təşkilatçılığı ilə keçirilən beynəlxalq musiqi festivalları, sərgilər, konfranslar və digər tədbirlər ölkəmizin zəngin mədəni irsinin dünya ictimaiyyətinə çatdırılmasında böyük rol oynayır. O, həmçinin Azərbaycan incəsənətinin UNESCO səviyyəsində tanınması və qorunması istiqamətində əvəzsiz fəaliyyət göstərmişdir.
İnsanlara münasibətdə Mehriban xanımın davranışı daima diqqət mərkəzində olmuşdur. Şəhid ailələri, qazilər, aztəminatlı ailələr, əlillər, yaşlı insanlar – bütün bu sosial təbəqələr Mehriban xanımın qayğısını hər zaman hiss ediblər. Onun həyata keçirdiyi sosial layihələr bir daha sübut edir ki, Mehriban xanım üçün vəzifə yalnız səlahiyyətlər deyil, eyni zamanda böyük məsuliyyət və xalqa xidmətdir.
Mehriban xanım Əliyevanın ölkəmizdə tolerantlıq və multikulturalizm siyasətinin güclənməsində də rolu danılmazdır. Müxtəlif din və millətlərin nümayəndələri ilə səmimi münasibətlərin qurulması, dini abidələrin bərpası və qorunması istiqamətində görülən işlər Azərbaycanın dünyada multikultural bir ölkə kimi tanınmasına xidmət edir.
2017-ci ilin fevral ayından etibarən Azərbaycan Respublikasının Birinci vitse-prezidenti vəzifəsini icra edən Mehriban xanım bu mötəbər vəzifədə də yüksək peşəkarlıq və məsuliyyət nümayiş etdirir. Onun fəaliyyəti Prezident İlham Əliyevin rəhbərliyi ilə həyata keçirilən inkişaf kursuna mühüm dəstəkdir. Mehriban xanım dövlət idarəçiliyində və siyasi qərarların verilməsində qadınların rolunun artmasına da örnək olmuşdur.
Əziz Mehriban xanım,
26 avqust – Sizin doğum gününüz münasibətilə Sizi səmimi qəlbdən təbrik edirik! Sizin yüksək intellektiniz, xalqa olan sevginiz, vətənə sədaqətiniz, mərhəmətli və insanpərvər fəaliyyətiniz sayəsində Azərbaycan xalqı Sizi həm dövlət xadimi, həm ana, həm də örnək vətəndaş kimi dərin hörmətlə qəbul edir.
Uca Allahdan Sizə möhkəm can sağlığı, ailə səadəti və xalqımız naminə fəaliyyətinizdə uğurlar diləyirik. Azərbaycan xalqı Sizinlə fəxr edir və Sizin humanist dəyərləriniz bu gün cəmiyyətimizdə ən ali mənəvi ölçülərdən birinə çevrilib.
Doğum gününüz mübarək olsun, Mehriban xanım!

Hazırladı: Şahmar Zərdabi

Yazıçı-publisist