Taleh Məmmədov: Ulu Öndər Heydər Əliyev – Xalqın qəlbində əbədi yaşayan LİDER

12 dekabr Azərbaycan xalqının həyatında xüsusi yeri olan bir gündür. Bu tarix Ümummilli Lider Heydər Əliyevin anım günüdür. Hər il bu gün ölkənin hər yerində böyük ehtiramla qeyd edilir, xalqımız Ulu Öndərin əziz xatirəsini dərin hörmət və minnətdarlıqla yad edir. Çünki Heydər Əliyev yalnız bir siyasi lider deyildi — o, Azərbaycanın xilaskarı, dövlətçiliyimizin memarı, milli ideologiyamızın banisi, xalqını zamanın ağır sınaqlarından uğurla çıxaran dahi şəxsiyyət idi.

Onun həyatı bütöv bir millətin taleyi ilə sıx bağlı olub. Heydər Əliyevin dövlətçilik fəaliyyəti iki mühüm tarixi mərhələni əhatə edir. 1969-cu ildə Azərbaycan SSR-in rəhbəri seçildiyi ilk dövrdən etibarən o, respublikanı inkişaf yoluna çıxardı. O zaman Azərbaycan iqtisadi, sosial və mədəni sahələrdə böyük irəliləyişlər əldə etdi. Zavod və fabriklər açıldı, yeni sənaye müəssisələri istifadəyə verildi, xalqın sosial rifahı yaxşılaşdırıldı. Bu dövr Azərbaycan tarixində intibah mərhələsi kimi yadda qaldı və həmin inkişafın mərkəzində Heydər Əliyev dayanırdı.

Müstəqilliyin ilk illəri isə Azərbaycan üçün ən çətin dövrlərdən biri oldu. Daxili çəkişmələr, iqtisadi böhran, torpaqların işğalı, dövlətçiliyin çökmə təhlükəsi ölkəni uçuruma aparırdı. Belə bir vaxtda xalqın ümid yeri yenidən Heydər Əliyev oldu. 1993-cü ildə onun hakimiyyətə qayıdışı Azərbaycanı vətəndaş müharibəsindən xilas etdi, sabitlik bərqərar oldu və dövlətçiliyin möhkəm təməlləri qoyuldu. Heydər Əliyev qısa zaman ərzində ölkəni dağınıqlıqdan çıxararaq inkişaf yoluna yönəltdi. 

Onun ən böyük xidmətlərindən biri müasir Azərbaycanın ideoloji və siyasi əsaslarını yaratmasıdır. 1995-ci ildə qəbul olunan Konstitusiya dövlətin hüquqi çərçivəsini, inkişafın strateji xəttini müəyyən etdi. Heydər Əliyev iqtisadiyyatın modernləşməsi üçün geniş islahatlar həyata keçirdi, ölkənin enerji siyasətini formalaşdırdı. “Əsrin müqaviləsi” Azərbaycanın gələcək iqtisadi qüdrətinin əsası oldu və bu gün dövlətimizin beynəlxalq mövqeyini müəyyənləşdirən ən mühüm layihələrdən biri kimi qiymətləndirilir.

Heydər Əliyevin rəhbərliyi altında Azərbaycan beynəlxalq aləmdə nüfuzlu tərəfdaşa çevrildi. O, ölkənin xarici siyasət strategiyasını elə qurdu ki, Azərbaycan çoxtərəfli, balanslı və milli maraqlara əsaslanan siyasi kursu ilə tanındı. Ulu Öndər həmişə qeyd edirdi ki, Azərbaycanın müstəqilliyi əbədidir və onun qorunması hər şeydən önəmlidir. Məhz bu baxış bu gün də dövlət siyasətinin əsasını təşkil edir.

Azərbaycançılıq ideologiyasının formalaşdırılması da Heydər Əliyevin tarixi xidmətlərindəndir. Bu ideya xalqın milli birliyinin, bütövlüyünün və dövlətçilik düşüncəsinin əsasını təşkil edir. Azərbaycançılıq hər bir vətəndaşı bu torpağa, bu dövlətə, bu millətə bağlılıq hissi ilə birləşdirən mənəvi-ideoloji dəyərdir. Bu gün dünya azərbaycanlılarının birliyi və həmrəyliyi məhz Ulu Öndərin irəli sürdüyü bu ideyanın gücü ilə möhkəmlənir.

Heydər Əliyevin müəyyən etdiyi dövlətçilik yolu Prezident İlham Əliyev tərəfindən böyük məsuliyyət və qətiyyətlə davam etdirilir. Bu gün Azərbaycanın regionun lider dövləti kimi inkişaf etməsi, 2020-ci ildə müzəffər Ordumuzun Qələbəsi ilə tarixi ədalətin bərpası, işğaldan azad olunmuş torpaqlarda geniş quruculuq işlərinin aparılması Heydər Əliyevin yaratdığı möhkəm təməlin və onun siyasi kursunun davamının nəticəsidir. Prezident İlham Əliyevin “Biz Heydər Əliyev yolunu layiqincə davam etdiririk” sözləri Ulu Öndərin irsinə olan böyük ehtiramın ifadəsidir.

12 dekabr xalqın qəlbində təkcə matəm günü deyil, həm də minnətdarlıq günüdür. Bu gün hər bir azərbaycanlı Heydər Əliyevin ölkəmiz üçün gördüyü nəhəng işləri xatırlayır, onun xalqına olan sevgisini, fədakarlığını və müdrikliyini bir daha dəyərləndirir. O, yalnızlarımızın deyil, gələcək nəsillərin də örnək alacağı əbədi bir dəyərdir.

Ulu Öndər Heydər Əliyev zamanların fövqünə qalxan LİDER idi. Onun qoyduğu irs, yaratdığı dövlətçilik məktəbi, milli ideologiyası bu gün də yaşayır və Azərbaycanı yeni zirvələrə aparır. Xalqımız Ümummilli Liderin müqəddəs xatirəsini hər zaman böyük ehtiramla yad edəcək, onun yolu gələcək nəsillər üçün də örnək olaraq qalacaq.

Allah rəhmət eləsin!

Taleh Məmmədov

“Shirvan Operating Company Ltd” Şirkətinin Azərbaycan Respublikasındakı Filialı

Həmkarlar İttifaqı Komitəsinin sədri