“Google”a qarşı araşdırma başladı

Avropa Komissiyası “Google” şirkətinin media nəşriyyatlarının məzmununu axtarış nəticələrində bilərəkdən gerilətməsi ilə bağlı rəsmi araşdırmaya start verib.

“Qafqazinfo”nun məlumatına görə, Komissiyanın açıqlamasında bildirilir ki, araşdırmanın əsas məqsədi “Google”un axtarış sistemində media saytlarına bərabər və ayrı-seçkiliksiz çıxış imkanı verib-vermədiyini müəyyənləşdirməkdir.

İddiaya görə, şirkət öz dominant mövqeyindən istifadə edərək, xəbər və digər nəşriyyat saytlarının reytinqini aşağı sala bilər. “Google” isə bu siyasətin məqsədinin axtarış nəticələrində manipulyasiyanın qarşısını almaq olduğunu bildirir.

Avropa Komissiyası araşdırma çərçivəsində bu siyasətin nəşriyyatların gəlirlərinə və biznes azadlıqlarına təsirini də qiymətləndirəcək.

Qurumun açıqlamasında vurğulanıb ki, araşdırmaya başlanması “Google” tərəfindən qayda pozuntusu edildiyi anlamına gəlmir. Lakin uyğunsuzluq təsdiqlənərsə, “Alphabet” şirkətinə ilkin nəticələr təqdim olunacaq və müvafiq tədbirlər təklif ediləcək.

Qayda pozuntusu sübuta yetirildiyi halda, şirkət illik qlobal dövriyyəsinin 10 faizinədək məbləğdə cərimə oluna bilər. Təkrarlanan hallarda isə bu rəqəm 20 faizə qədər yüksələ bilər.