İş adamı Cəbrayıl Cəbrayılov: “18 oktyabr – müstəqilliyin bərpası günü Azərbaycan tarixinə qızıl hərflərlə yazıldı”

Azərbaycan xalqının tarixi çoxəsrlik mübarizə və qəhrəmanlıq səhifələri ilə doludur. Bu tarixin ən parlaq səhifələrindən biri isə şübhəsiz ki, 1991-ci ilin 18 oktyabr tarixi – müstəqilliyimizin bərpası günüdür. Həmin gün Azərbaycan xalqı azadlıq və dövlətçilik ideallarına qovuşaraq, öz müqəddəratını özü müəyyənləşdirməyə başladı. Məhz buna görə də 18 oktyabr xalqımızın milli qürur, dövlətçilik və azadlıq günü kimi əbədi tariximizə yazılıb.

Tanınmış iş adamı, vətənpərvər şəxs Cəbrayıl Cəbrayılov bu əlamətdar gün barədə danışarkən deyir: “18 oktyabr – müstəqilliyin bərpası günü Azərbaycan tarixinə qızıl hərflərlə yazıldı. Bu gün xalqımızın azadlıq ruhunun, milli birliyinin və dövlətçilik iradəsinin təntənəsidir.”

Azərbaycan xalqı əsrlər boyu müstəqillik uğrunda mübarizə aparmış, azad yaşamaq istəyindən heç vaxt vaz keçməmişdir. 1918-ci ildə yaradılan Azərbaycan Xalq Cümhuriyyəti bu arzunun ilk təzahürü idi. Həmin dövrdə demokratik dövlətin qurulması xalqımızın müstəqil dövlətçilik bacarığını bir daha nümayiş etdirdi. Lakin cəmi 23 ay sonra Cümhuriyyətin süqutu müstəqillik yolumuzu yarımçıq qoydu.

Bu azadlıq arzusu uzun illər sovet rejiminin təzyiqləri altında olsa da, xalqın ruhunda heç vaxt sönmədi. Nəhayət, 1991-ci ilin 18 oktyabrında Azərbaycan Respublikasının Ali Soveti “Dövlət Müstəqilliyi haqqında Konstitusiya Aktı”nı qəbul etməklə tarixi ədaləti bərpa etdi. O gündən etibarən Azərbaycan xalqı öz gələcəyini özü müəyyənləşdirməyə başladı.

Müstəqilliyin bərpası hələ onun qorunması demək deyildi. 1990-cı illərin əvvəllərində Azərbaycan böyük sınaqlarla üzləşdi – iqtisadi çətinliklər, siyasi sabitsizlik, separatizm meyilləri ölkənin müstəqilliyini təhdid edirdi.

Cəbrayıl Cəbrayılovun da vurğuladığı kimi, “Azərbaycanı bu ağır vəziyyətdən xilas edən, müstəqilliyimizi əbədi edən lider məhz Ulu Öndər Heydər Əliyev oldu.”

Ulu Öndər Heydər Əliyevin 1993-cü ildə hakimiyyətə qayıdışı ilə ölkədə sabitlik, dövlətçilik prinsipləri və milli həmrəylik bərpa olundu. Güclü dövlət idarəetməsi formalaşdı, iqtisadiyyat dirçəldi, Azərbaycanın beynəlxalq nüfuzu artdı. Bu illər müstəqil dövlətçiliyimizin bərkiməsinin əsas mərhələsi idi.

Bu gün Azərbaycan müstəqil siyasət aparan, iqtisadi və siyasi cəhətdən güclü, beynəlxalq aləmdə hörmətlə qarşılanan bir dövlətdir. Prezident İlham Əliyevin rəhbərliyi ilə həyata keçirilən uzaqgörən siyasət nəticəsində ölkəmiz regionun liderinə çevrilib.

Cəbrayıl Cəbrayılov bu barədə belə deyir: “Prezident İlham Əliyevin müdrik rəhbərliyi ilə Azərbaycan bu gün öz sözünü deyən, öz qərarını verən, dünyada nüfuzlu bir dövlətə çevrilib. Bu, müstəqilliyimizin bəhrəsidir və biz hər gün onun qiymətini bilməliyik.”

44 günlük Vətən müharibəsində qazanılan tarixi Qələbə də məhz bu güclü dövlətçilik siyasətinin nəticəsi oldu. Azərbaycanın torpaqları azad olundu, 30 illik ədalətsizlik aradan qaldırıldı. Bu Zəfər həm də müstəqilliyimizin və dövlət suverenliyimizin ən böyük göstəricisidir.

İş adamı kimi Cəbrayıl Cəbrayılov müstəqilliyin verdiyi iqtisadi imkanların da dəyərini yaxşı anlayır. Onun sözlərinə görə, “Əgər bu gün sahibkarlar sərbəst fəaliyyət göstərə, öz bizneslərini inkişaf etdirə bilirlərsə, bu, məhz müstəqilliyin sayəsindədir.”

Doğrudan da, müstəqillik illərində Azərbaycanda sahibkarlıq sahəsi geniş inkişaf edib. Dövlətin dəstəyi, iqtisadi islahatlar və əlverişli biznes mühiti nəticəsində yerli sahibkarlar həm ölkə iqtisadiyyatına töhfə verir, həm də sosial məsuliyyət daşıyırlar.

Cəbrayıl Cəbrayılov bu istiqamətdə fəaliyyət göstərən iş adamlarından biridir. O, ölkədə sosial layihələrə, xeyriyyəçilik təşəbbüslərinə dəstək göstərməklə, şəhid ailələrinə, qazilərə və aztəminatlı insanlara yardım etməklə müstəqillik ruhunu yaşadır.

Müstəqillik təkcə siyasi azadlıq deyil, həm də milli kimliyin, xalq birliyinin, dilimizin və mədəniyyətimizin qorunması deməkdir. Məhz bu dəyərlər sayəsində Azərbaycan bu gün həm milli, həm də beynəlxalq səviyyədə tanınan müasir dövlətə çevrilib.

Cəbrayıl Cəbrayılov vurğulayır: “Müstəqillik bizim ən böyük sərvətimizdir. Bu gün hər bir azərbaycanlı bu sərvəti qorumağa, onu gələcək nəsillərə ötürməyə borcludur. Biz birlikdə olduqca müstəqilliyimiz əbədi olacaq.”

Bu fikirlər həm işgüzar, həm də vətənpərvər mövqedən səslənir. Çünki xalqla dövlətin birliyi, hər bir vətəndaşın məsuliyyət hissi müstəqilliyimizin əsas təminatıdır.

18 oktyabr – Azərbaycan Respublikasının Müstəqilliyinin Bərpası Günü hər bir azərbaycanlı üçün qürur və iftixar günüdür. Bu tarix bizə azadlığın qiymətini, dövlətimizin əzəmətini və xalqımızın iradəsini xatırladır.

İş adamı Cəbrayıl Cəbrayılovun sözləri ilə desək:“18 oktyabr təkcə bir tarix deyil, həm də milli ruhumuzun dirçəliş günüdür. O gün Azərbaycan xalqı dünyaya sübut etdi ki, azad yaşamaq onun ən təbii haqqıdır. Biz bu haqqı qorumaq, yaşatmaq və əbədi etmək borcundayıq.”

Bu gün müstəqilliyimiz dönməz və əbədidir. Çünki onun kökündə xalqın iradəsi, liderimizin uzaqgörən siyasəti və hər bir vətəndaşın dövlətinə olan sevgisi dayanır.

Yaşasın müstəqil Azərbaycan! Yaşasın 18 oktyabr – qürur və azadlıq günümüz!

Fərid Faiqoğlu

Xezertv.info-nun rəhbəri

AJB-nin üzvü