Şəhid Vidadi Zalovun atası, Saray Bələdiyyəsinin sədri və Abşeron rayon Ağsaqqallar Şurasının sədri Nizami Zalov: “44 günlük Vətən müharibəsi Azərbaycan tarixinə qızıl hərflərlə yazıldı”

Azərbaycan xalqının qürur salnaməsində elə günlər var ki, onlar əsrlər keçsə də, yaddaşlardan silinmir. 2020-ci ilin payızında baş vermiş 44 günlük Vətən müharibəsi də məhz belə bir tarixi hadisədir. Bu savaş təkcə torpaqlarımızın azadlığı uğrunda aparılan döyüş deyil, həm də xalqımızın birliyinin, milli ruhunun, dövlət başçısına olan inamının təntənəsi idi.

Bu mövzuda danışan şəhid atası, Saray Bələdiyyəsinin sədri və Abşeron rayon Ağsaqqallar Şurasının sədri Nizami Zalov qeyd edib ki, 44 günlük Vətən müharibəsi Azərbaycan xalqının əsrlər boyu gözlədiyi haqq savaşının zirvəsi oldu. “Bu müharibə bizim milli qürurumuzu, birliyimizi və sarsılmaz iradəmizi dünyaya nümayiş etdirdi. Azərbaycan Ordusu Müzəffər Ali Baş Komandan İlham Əliyevin rəhbərliyi ilə 30 ilə yaxın işğal altında qalan torpaqlarımızı azad edərək, ədaləti bərpa etdi. 44 gün – bu rəqəm sadəcə bir zaman ölçüsü deyil, qəhrəmanlıq dastanıdır,” – deyə Nizami Zalov bildirib.

O vurğulayıb ki, bu zəfər həm döyüş meydanında, həm diplomatik, həm də informasiya cəbhəsində aparılan mübarizənin nəticəsi idi. “Prezident İlham Əliyev həm ordunun rəhbəri, həm xalqın lideri, həm də diplomatiya meydanında əvəzsiz sərkərdə kimi çıxış etdi. Hər bir çıxışı, hər bir əmri xalqda ruh yüksəkliyi yaradırdı. Biz bir daha gördük ki, güclü lideri olan xalq heç vaxt məğlub olmur,” – deyə o qeyd edib.

Nizami Zalov şəhid atası kimi bu qələbənin dəyərini daha dərindən hiss etdiyini bildirir: “Oğlum Vidadi kimi yüzlərlə qəhrəman gənc Vətən torpağı uğrunda canından keçdi. Onlar bu torpağa azadlıq, xalqımıza isə qürur bəxş etdilər. Hər dəfə şəhidlərimizin adını çəkəndə qəlbim həm fəxr, həm də nisgil hissi ilə dolur. Fəxr edirəm ki, oğlum və onun silahdaşları bu qələbənin memarları sırasında yer alıblar.”

O, eyni zamanda bildirib ki, şəhid ailələrinə və qazilərə göstərilən dövlət qayğısı bu qələbənin mənəvi davamıdır: “Cənab Prezident və Birinci vitse-prezident Mehriban xanım Əliyevanın şəhid ailələrinə göstərdiyi diqqət və qayğı bizim üçün böyük təsəllidir. Şəhid ailələri unudulmur, onlara hər zaman hörmətlə yanaşılır. Bu, dövlətimizin və xalqımızın mənəvi böyüklüyünün göstəricisidir.”

Nizami Zalov qeyd edib ki, 44 günlük müharibə Azərbaycan xalqının milli birliyinin, ordunun və xalqın bir məqsəd uğrunda mübarizə aparmaq bacarığının parlaq nümunəsi oldu. “Bu müharibə zamanı yaşlısından gəncinə qədər hər bir vətəndaş bir amal uğrunda birləşdi – Vətən sevgisi. Qadınlar, analar, müəllimlər, tələbələr, iş adamları – hamı Ordumuz üçün canla-başla çalışırdı. Mən o günləri heç vaxt unuda bilmirəm. Bu, təkcə ordunun deyil, bütün xalqın müharibəsi idi,” – deyə o bildirib.

Saray Bələdiyyəsinin sədri kimi Nizami Zalov, həm də bu gün azad edilmiş torpaqlarda aparılan bərpa və quruculuq işlərindən qürurla danışıb: “İndi o torpaqlarda həyat yenidən doğulur. Qarabağda tikilən yollar, məktəblər, xəstəxanalar, hava limanları – bunlar hamısı 44 günlük zəfərin davamıdır. Biz o torpaqlara yalnız qələbə ilə deyil, həyatla, inkişafla qayıtmışıq. Bu, Prezident İlham Əliyevin uzaqgörən siyasətinin nəticəsidir.”

Nizami Zalov eyni zamanda Ağsaqqallar Şurasının sədri kimi qeyd edib ki, bu qələbə gənc nəslin vətənpərvərlik ruhunda tərbiyə olunması üçün mühüm bir məktəbdir. “Bizim vəzifəmiz budur ki, bu zəfəri unudulmaz edək, gənclərə şəhidlərin qəhrəmanlığını, Ali Baş Komandanın liderliyini, xalqın birliyini anladaq. Gənc nəsil bilməlidir ki, bu torpaqlar azadlığı bahasına qazanılıb. Vətən sevgisi və dövlətə sədaqət ən ali dəyərlərdir.”

O, bir ata kimi, bir ağsaqqal kimi və bir vətəndaş kimi ürək sözlərini bu cür ifadə edib: “Bu gün biz azad, qalib və qüdrətli Azərbaycan dövlətinin vətəndaşlarıyıq. Bu gün Xankəndidə, Şuşada, Füzulidə, Cəbrayılda, Zəngilanda Azərbaycan bayrağı dalğalanırsa, bu, şəhidlərimizin qanı, ordumuzun gücü və xalqımızın birliyi sayəsindədir. 44 günlük Vətən müharibəsi tariximizin ən şanlı səhifəsidir. Bu səhifə Azərbaycan xalqının iradəsi, Prezident İlham Əliyevin qətiyyəti, Azərbaycan Ordusunun rəşadəti ilə yazıldı.”

Nizami Zalov: “Qoy hər bir azərbaycanlı bu qələbənin dəyərini unutmasın. Qoy hər bir evdə şəhidlərimizin ruhuna dualar oxunsun, qazilərimizə hörmətlə yanaşılsın. Biz bu torpaqları azad etdik və bundan sonra da qorumaq, inkişaf etdirmək, birliyimizi əbədi saxlamaq bizim borcumuzdur.”

Xəzərtv.info redaksiyası da öz növbəsində 44 günlük Vətən müharibəsinin qəhrəmanlarını dərin ehtiramla yad edir, şəhidlərimizə Allahdan rəhmət, qazilərimizə can sağlığı diləyir.
Bu Zəfər – Azərbaycan xalqının sarsılmaz iradəsinin, milli ruhunun və dövlətinə olan sonsuz sədaqətinin simvoludur. 44 günlük müharibə əbədi olaraq Azərbaycan tarixinə qızıl hərflərlə yazılmış Qələbə dastanı kimi qalacaq

Fərid Faiqoğlu

Xezertv.info-nun rəhbəri

“Qızıl Qələm” mükafatçısı

“Azərbaycan Jurnalistlər Birliyi”nin üzvü

Azərbaycan Vətən Müharibəsi Veteranları İB-nin fəxri üzvü

Qayğıya Ehtiyacı və Əlilliyi Olan Şəxslərə Dəstək İB-nin mətbuat katibi