“Buna görə Obama və Klinton cavabdehlik daşıyır”

“Sabiq Prezident Barak Obama və dövlət katibi Hillari Klinton 2016-cı il prezident seçkilərinə Rusiyanın müdaxiləsi ilə bağlı materialları saxtalaşdırdıqlarına görə cavabdehlik daşımalıdırlar”.

“Qafqazinfo” xəbər verir ki, bu fikirləri ABŞ Prezidenti Donald Tramp “Newsmax”a müsahibəsində deyib.

Lakin o qeyd edib ki, bu məsələdə qərarı baş prokuror Pem Bondi verir: “Düşünürəm ki, onlar müəyyən bir məbləğ ödəməlidirlər. Yeri gəlmişkən, bu, çox böyük rəqəmdir”.

Həmin hadisələrdən danışan Amerika lideri əlavə edib ki, bu, ölkə tarixindəki ən böyük qalmaqallardan biridir. Eyni zamanda, o, ittihamın irəli sürülməsi qərarına təsir etməyəcəyini açıqlayıb.

Xatırladaq ki, ötən ay ABŞ Milli Kəşfiyyat İdarəsinin rəhbəri Tulsi Qabbard Obama administrasiyasının ABŞ-də 2016-cı ildə keçirilmiş seçkilərə Rusiyanın müdaxiləsi ilə bağlı yalan məlumat yaydığını bildirmişdi. ABŞ kəşfiyyatının hazırkı qiymətləndirməsi belədir ki, Rusiyanın seçkiyə müdaxilə etməklə bağlı nə imkanı, nə də arzusu olub. Qabbard Obamanın 2016-cı il seçkilərində qalib gələn Trampa problemlər yaratmaq üçün yalan məlumatların yayılmasına göstəriş verdiyinə əminliyini ifadə edib. Onun sözlərinə görə, işi dövlətə xəyanət cəhdi hesab etmək olar.