"AĞ XALATLI MƏLƏK" — NİGAR MƏLİKQASIMOVA

Müasir səhiyyəmizin örnəyi, anaların güvən yeri

İnsan həyatının ən müqəddəs anlarından biri yeni bir canın dünyaya gəlişidir. Bu anın təhlükəsizliyi, anaların və körpələrin sağlamlığı isə əsl peşəkarların, insanpərvər həkimlərin əlindədir. Belə həkimlərdən biri, tibb elminə və Azərbaycan səhiyyəsinə töhfələr verən, yüzlərlə ana və körpənin həyatına nur bəxş edən, doğum sahəsinin peşəkarı, tibb üzrə fəlsəfə doktoru, mama-ginekoloq, M.Ə.Mirqasımov adına Respublika Klinik Xəstəxanasının Doğum Şöbəsinin müdiri Nigar Məlikqasımovadır.

Nigar Məlikqasımova tibb elminə olan marağını gənc yaşlarından göstərmiş, bu sahədə böyük əzmkarlıqla çalışaraq ali tibbi təhsilini uğurla başa vurmuşdur. O, təkcə nəzəri biliklərlə kifayətlənməmiş, daim öz üzərində çalışaraq dünyanın müxtəlif ölkələrində keçirilən təlimlərdə, konfranslarda iştirak etmiş və yeni tibbi yenilikləri Azərbaycana gətirmək üçün əzmlə çalışmışdır.

Nigar xanımın peşəkarlığı yalnız texniki bacarığında deyil, həm də xəstəyə yanaşmasında, hər anaya fərdi diqqət və qayğı göstərməsində öz əksini tapır. O, həkimlik peşəsini sadəcə bir ixtisas deyil, mənəvi bir missiya kimi qəbul edir. Onun üçün hamilə bir qadının sağlam şəkildə doğuşa aparılması, körpənin sağlam şəkildə dünyaya gəlməsi — bu, müqəddəs bir andır.

Azərbaycanın yaxın tarixində yaşanan Vətən müharibəsi xalqımızın birliyini, qəhrəmanlığını və fədakarlığını göstərdi. Bu mübarizədə şəhid və qazilərimiz Azərbaycan tarixinin qızıl səhifələrinə adlarını yazdırdılar. Nigar Məlikqasımova bu qəhrəmanların ailələrinə xüsusi diqqət və qayğı ilə yanaşan həkimlərdəndir. O, bu ailələrin üzvlərini fərqləndirmədən, onların hər birini doğma insanı kimi qarşılayır, ehtiyac duyduqları tibbi yardımı nəinki peşəkar səviyyədə göstərir, həm də mənəvi dəstək olur.

Onun rəhbərlik etdiyi Doğum şöbəsində şəhid xanımlarına, qazilərin ailələrinə prioritet yanaşma tətbiq olunur. Hər bir şəhid ailəsi üzvü ilə xüsusi maraqlanmaq, onların hamiləlik dövrünün sağlam və təhlükəsiz keçməsini təmin etmək Nigar xanım üçün vəzifə deyil, vicdani bir borcdur.

PasiyentləriarasındaNigarMəlikqasımovanınadı “ağ xalatlı mələk” kimitanınır. Bu ad ona xalqın, xüsusilə də ana olmuş qadınların verdiyi dəyərin göstəricisidir. Doğum anı bir qadın üçün həm fiziki, həm də psixoloji baxımdan çətin bir mərhələdir. Bu mərhələdə əlinə tutacaq bir insan, ümid verəcək bir baxış, güvən hissi verəcək bir söz hər şeydən qiymətlidir. Nigar xanım bu cür anlarda qadınlara yalnız həkim kimi yox, həm də bir bacı, bir ana, bir sirdaş kimi dəstək olur.

Nigar Məlikqasımova təkcə klinik fəaliyyətlə kifayətlənmir, elmi araşdırmalara da böyük önəm verir. O, tibb üzrə fəlsəfə doktoru kimi bir çox elmi işlərə imza atmış, qadın sağlamlığı, doğuş zamanı baş verən risklər, ana və uşaq ölümlərinin qarşısının alınması yolları ilə bağlı araşdırmalar aparmışdır. Onun elmi məqalələri yerli və beynəlxalq tibbi jurnallarda dərc olunmuşdur.

Nigar xanım həmçinin gənc həkimlərin yetişdirilməsində də fəal rol oynayır. Onun rəhbərliyi altında rezident həkimlər praktiki biliklərlə yanaşı, etik davranış qaydalarını, xəstəyə şəfqətlə yanaşma fəlsəfəsini də mənimsəyirlər. Bu, gələcəyin mama-ginekoloqlarının formalaşmasında çox önəmli bir məktəbdir.

Nigar Məlikqasımova Azərbaycan dövlətinin səhiyyə sahəsində apardığı islahatları dəstəkləyən, bu siyasətin tibb işçiləri arasında doğru başa düşülməsinə və tətbiqinə çalışan bir ziyalıdır. Onun fəaliyyəti, Prezident İlham Əliyevin və Birinci vitse-prezident Mehriban Əliyevanın səhiyyə sahəsində qoyduğu inkişaf kursuna uyğundur. Xüsusilə ana və uşaq sağlamlığına göstərilən diqqətin reallaşmasında Nigar xanım və onun rəhbərlik etdiyi kollektiv mühüm rol oynayır.

O, səhiyyənin yalnız xəstəliklərlə mübarizə deyil, həm də sosial rifahın vacib sütunu olduğunu dəfələrlə vurğulamış və bu mövzularda ictimai tədbirlərdə fəal iştirak etmişdir.

Nigar Məlikqasımovanın peşəsinə və xəstələrinə göstərdiyi sevgi onun gözlərindəki parıltıdan oxunur. Onun yanına gələn hər pasiyent, istər ilk dəfə ana olacaq qadın, istərsə də təkrar doğuşa gələn ana — hər biri Nigar xanımın təcrübəsinə, insanlığına güvənir. Onun səmimi təbəssümü, mülayim tonu, təşviqedici sözləri minlərlə qadının doğum anında içindəki qorxunu əvəzsiz bir güvən hissi ilə əvəz etmişdir.

Nigar Məlikqasımovanın uğurlarının təməlində onun ailə dəyərlərinə sadiqliyi, valideyn qayğısı ilə böyüməsi və milli-mənəvi köklərə bağlılığı dayanır. O, təkcə peşəkar bir həkim deyil, həm də vətənpərvər bir ziyalı, övladlarına vətəni sevməyi öyrədən bir anadır. Həm ailədə, həm işdə mükəmməl tarazlıq yaradan, işinə sadiq, evinə mərhəmətli bir qadın obrazıdır.

Bəzən bir həkim haqqında ən dürüst rəyi onun şəfa verdiyi insanlar verir. Nigar Məlikqasımovanın adını bu gün yüzlərlə ailə dua ilə anır. Onun kömək etdiyi körpələr artıq məktəbə gedir, bəziləri yeniyetmə yaşdadır, bəziləri isə yeni doğulub. Amma hamısının ortaq nöqtəsi — onların dünyaya sağlam və təhlükəsiz gəlməsində bu fədakar həkimin əvəzsiz rolu olmasıdır.

Tibb elmi insan həyatını qorumaq, yaşatmaq və sağlam gələcək təmin etmək məqsədi ilə yaranmışdır. Bu missiyanı layiqincə yerinə yetirən hər bir həkim cəmiyyətin ən dəyərli üzvüdür. Nigar Məlikqasımova bu dəyəri yalnız peşəsi ilə deyil, həm də şəxsiyyəti ilə daşıyan bir insandır. Onun barəsində deyilən “ağ xalatlı mələk” ifadəsi təsadüfi deyil — bu, minlərlə insanın qəlbində yaşayan bir həqiqətdir.

O, öz peşəsinə sədaqəti, şəhid və qazi ailələrinə göstərdiyi qayğı, müasir səhiyyəyə verdiyi töhfələr və ən əsası, insanlara olan sevgi ilə bu günümüzün əsl qəhrəmanıdır. Nigar Məlikqasımova — sağlam gələcəyin, sağlam anaların və sağlam nəsillərin təminatçısı olan örnək bir həkim, örnək bir qadındır.

Səxavət Nur