EYVAZ HÜNBƏTOV – 77

El adamı haqqında ulu müdriklrimizin idrak işığından bu günümüzə saçılan,  qədimliyi qədərincə çağdaş səslənən  belə bir deyim var ki, filankəs qənimət adamdır.  "Türk Ağsaqqalları arasında Əlaqələrin İnkişafı" İctimai Birliyinin  (#TAİB) sədr müavini, Türk Dünyası Araşdırmaları Beynəlxalq Akademiyasının fəxri professoru, sabiq dövlət qulluqçusu, ağsaqqal ucalığında olan  Eyvaz Səfər oğlu Hünbətov  özünün şərəfli ömür yolu ilə bu həqiqəti bariz təsdiq edən  bir şəxsiyyətdir. 
      Yüksək mədəniyyətə malik, təbiətən mülayim, təvazökar, aydın fikirli, işgüzar və məsuliyyətli, eyni zamanda, məqamında qaya kimi sərt bir insan olaraq tanınan, əvvəlcə Bakı şəhər Yaşıllaşdırma Müəssisələri Baş İstehsalat İdarəsinin 2 saylı Yaşıllaşdırmanın İstismarı Trestinin, sona isə  isə 1 saylı Yaşıllaşdırmanın İstismarı Trestinin rəisi  olaraq paytaxtımızın  yaşıllaşdırılmasında böyuk əməyi olan Eyvaz Hünbətov yaşıllığa, ağaca həyat mənbəyi kimi baxır, ağac əkməyi, ona qulluq etməyi insanın doğuluşu və kamilliyi qədər müqəddəs sayır...  
     Bu düşüncələr fonunda fikrimi Eyvaz Hünbətovun  doğum gününə günlükləyib,  məsləkdaşımız, dostumuzu dünyaya təşrif buyurduğu gün (5 dekabr), ömür təqviminin 77 illiyi münasibəti ilə qutlayır və ən xoş arzularla ithaf söz çələngimi qayəsi, məramı işıqlı el ağsaqqalına, batman Kişiyə hərarətlə ünvanlayiram:

Ağac-ağac, budaq-budaq
Bağ-bağata oldun  dayaq. 
Dünənindən gəlir soraq:
Səni görüm min budaq ol!

Neçə-neçə park, xiyaban -
Bakımızda bir gülüstan.
Müşkülləri etdin asan, 
Abadlığa çırmayıb  qol!

Təbiətin öz dili var;
Çiçəklərdə dinər bahar.
Payız çağı bağlarda bar...                                 
El dilində  alqışın bol!

Yaradana məhəbbətli,
Yaranışa mərhəmətli,
Yurda bağlı,  sədaqətli...
Bir örnəkdir keçdiyin yol! 
 
Səni görüm min budaq ol!
Abadlığa çırmadın  qol!
El dilində  alqışın bol!
Bir örnəkdir keçdiyin yol!  

            ✍️ Tapdıq ƏLİBƏYLİ