ƏDALƏT, ŞƏFFAFLIQ VƏ HUMANİZM — MƏHKƏMƏ PROSESİNDƏ HÜQUQUN ALİLİYİ

İnsan Hüquqları Müdafiəsi — “Defending Human Rights” şirkətinin rəhbəri, beynəlxalq hüquq müdafiəçisi İsmayıl Zalov Əhmədov Ədalət Füzuli oğlunun məhkəmə prosesində iştirak edib.

Beynəlxalq hüquq müdafiəçisi İsmayıl Zalov məhkəmə prosesi ilə bağlı mövqeyini bildirərək qeyd edib ki, proses onun müşahidəsinə əsasən obyektivlik, şəffaflıq və ədalət prinsipləri çərçivəsində keçirilib.

İsmayıl Zalovun sözlərinə görə, məhkəmə prosesində tərəflərin mövqelərinə diqqətlə yanaşılması, hüquqi prosedurlara riayət olunması və humanizm prinsiplərinin nəzərə alınması məhkəmə prosesinin əsas xüsusiyyətlərindən olub. 

Beynəlxalq hüquq müdafiəçisi vurğulayıb ki, hüquqi dövlətin əsas dayaqlarından biri məhkəmələrin qanun əsasında, müstəqil və ədalətli fəaliyyət göstərməsidir. Onun fikrincə, məhkəmə prosesləri ilə bağlı hər hansı fikir səsləndirilərkən konkret prosesin gedişinə və hüquqi faktlara əsaslanmaq vacibdir.

İsmayıl Zalov həmçinin qeyd edib ki, cinayət və ya digər hüquqi məsuliyyət məsələsində yekun qiyməti yalnız qanunun müəyyən etdiyi qaydada məhkəmə verə bilər. Buna görə də məhkəmə qərarı qüvvəyə minmədən hər hansı şəxsin günahkar kimi təqdim edilməsi hüquqi baxımdan düzgün yanaşma deyil.

O, hüquqi proseslər ətrafında əsassız ittiham və qarayaxma xarakterli yanaşmalardan çəkinməyə çağıraraq bildirib ki, cəmiyyətdə hüquqa, məhkəməyə və qanunun aliliyinə hörmət əsas prinsip olaraq qorunmalıdır.

Ədalət faktlara, qanuna və hüquqa söykənir. Məhkəmə zalında isə ən mühüm meyar qanunun aliliyidir.

ARHD.MEDİA