20 sentyabr – Azərbaycanın Dövlət Suverenliyi Günü milli qürur və dövlətçilik tariximizin şərəfli səhifəsidir

Taleh Qaraşov

Lənkəran Şəhər İcra Hakimiyyətinin başçısı

20 sentyabr Azərbaycan xalqının yaddaşında dövlətçilik, milli birlik, ərazi bütövlüyü və suverenliyin təntənəsi ilə bağlı mühüm tarixi günlərdən biri kimi xüsusi yer tutur. Bu əlamətdar tarix Azərbaycan Respublikasının bütün ərazisində dövlət suverenliyinin tam bərpa olunmasının rəmzi kimi xalqımızın milli qürur hissini daha da gücləndirir.

Bu tarix Azərbaycanın müstəqillik tarixində mühüm mərhələlərdən birini ifadə edir. Dövlət suverenliyi xalqın öz taleyini müəyyən etmək, öz ərazisində qanunlarını və dövlət idarəçiliyini tam şəkildə həyata keçirmək hüququnun ən ali göstəricilərindəndir.

Azərbaycanın dövlət müstəqilliyinin möhkəmləndirilməsi, ərazi bütövlüyünün və suverenliyinin təmin olunması uzun illər ərzində dövlət siyasətinin əsas istiqamətlərindən biri olub. Ulu Öndər Heydər Əliyevin müəyyən etdiyi dövlətçilik strategiyası müasir Azərbaycanın siyasi, iqtisadi və hüquqi əsaslarının möhkəmləndirilməsinə mühüm zəmin yaradıb. Bu siyasi kurs Azərbaycan Respublikasının Prezidenti, Müzəffər Ali Baş Komandan cənab İlham Əliyev tərəfindən ardıcıl və məqsədyönlü şəkildə davam etdirilib.

Prezident İlham Əliyevin rəhbərliyi ilə həyata keçirilən siyasət nəticəsində Azərbaycan iqtisadi və hərbi potensialını artırıb, beynəlxalq mövqelərini möhkəmləndirib və milli maraqlarını qətiyyətlə müdafiə edən dövlət kimi öz nüfuzunu daha da yüksəldib. Azərbaycan Ordusunun gücü, xalqımızın həmrəyliyi və dövlət rəhbərliyinin siyasi iradəsi ölkəmizin ərazi bütövlüyünün və suverenliyinin təmin olunmasında həlledici amillərdən olub.

20 sentyabrın Dövlət Suverenliyi Günü kimi qeyd edilməsi Azərbaycan xalqının öz tarixinin mühüm hadisələrinə verdiyi yüksək qiymətin ifadəsidir. Bu gün həm də gənc nəslə dövlətçilik ənənələrinin, vətənpərvərlik ruhunun və milli dəyərlərin aşılanması baxımından böyük əhəmiyyət daşıyır. Dövlət suverenliyi yalnız siyasi anlayış deyil, eyni zamanda hər bir vətəndaşın Vətən qarşısında məsuliyyətini, dövlətə bağlılığını və milli həmrəyliyini özündə ehtiva edən ali dəyərdir.

Lənkəran şəhəri də Azərbaycanın ictimai-siyasi və sosial həyatında özünəməxsus yeri olan qədim və gözəl bölgələrdən biridir. Cənub bölgəsinin inkişafında mühüm rol oynayan Lənkəranda son illərdə həyata keçirilən abadlıq, quruculuq və sosial layihələr insanların rifahının yüksəldilməsinə xidmət edir. Şəhərin inkişafı, müasir infrastrukturun yaradılması, küçə və yolların yenilənməsi, sosial obyektlərin təkmilləşdirilməsi dövlətin regionların inkişafına göstərdiyi diqqətin bariz nümunələrindəndir.

Dövlət siyasətinin yerlərdə həyata keçirilməsi, vətəndaş müraciətlərinə həssas yanaşılması, sosial məsələlərin diqqətdə saxlanılması və şəhərin inkişafı istiqamətində fəaliyyət göstərir. Dövlətçilik ənənələrinin qorunması, vətəndaşların dövlət qurumlarına inamının daha da möhkəmləndirilməsi və ictimai həmrəyliyin gücləndirilməsi bu fəaliyyətin mühüm istiqamətlərindəndir.

20 sentyabr həm də Azərbaycanın iqtisadi tarixində xüsusi əhəmiyyət daşıyan Neftçilər Günü ilə əlamətdardır. Azərbaycan neft sənayesi ölkənin iqtisadi inkişafında, dövlət büdcəsinin formalaşmasında, sosial layihələrin və böyük infrastruktur proqramlarının həyata keçirilməsində mühüm rol oynayıb. Neftçi əməyinin tarixi kökləri XIX əsrə gedib çıxır və Azərbaycan uzun illər dünya neft sənayesinin mühüm mərkəzlərindən biri kimi tanınıb.

Bu gün Azərbaycan neftçiləri ənənəvi peşəkarlıq məktəbini müasir texnologiyalar və yeni istehsal imkanları ilə birləşdirərək ölkənin enerji təhlükəsizliyinin təmin olunmasına töhfə verirlər. Neftçilərin fədakar əməyi, peşəyə sədaqəti və məsuliyyəti Azərbaycanın enerji strategiyasının həyata keçirilməsində mühüm amildir.

Dövlət Suverenliyi Günü ilə Neftçilər Gününün eyni tarixdə qeyd olunması da rəmzi məna daşıyır. Bir tərəfdən, bu tarix Azərbaycanın dövlət müstəqilliyinin və suverenliyinin təntənəsini ifadə edir, digər tərəfdən isə ölkənin iqtisadi qüdrətinin formalaşmasında böyük xidmətləri olan neftçilərin əməyinə ehtiramı nümayiş etdirir.

Bu əlamətdar gün münasibətilə Azərbaycan xalqını, xüsusilə ölkəmizin suverenliyinin qorunmasına xidmət edən hərbçilərimizi, şəhid ailələrini, qazilərimizi, veteranlarımızı və bütün vətəndaşlarımızı təbrik etmək hər birimiz üçün qürurvericidir.

Eyni zamanda, bütün neftçilərimizi – quruda və dənizdə, istehsalat sahələrində və mürəkkəb iş şəraitində Azərbaycan iqtisadiyyatının inkişafına öz töhfəsini verən zəhmətkeş insanları səmimi-qəlbdən təbrik edirik. Onlara möhkəm cansağlığı, ailə səadəti, işlərində uğurlar və yeni nailiyyətlər arzulayırıq.

20 sentyabr – Dövlət Suverenliyi Günü və Neftçilər Günü münasibətilə xalqımızı təbrik edir, Azərbaycanın dövlət müstəqilliyinin və suverenliyinin əbədi, dövlətimizin daha da qüdrətli və inkişaf etmiş olmasını arzulayırıq. Azərbaycanın üçrəngli bayrağı daim uca, dövlətçiliyimiz möhkəm, xalqımızın birliyi əbədi olsun!

Fərid Səfərov