Bilgəhdə tikinti ilə bağlı suallar: “Qazaxlı Faiq” obyektə hansı sənədlərlə rəhbərlik edir?

Bakı şəhəri, Sabunçu rayonu, Bilgəh qəsəbəsi, Azərbaycan qadını küçəsində aparıldığı bildirilən tikinti işləri ilə bağlı redaksiyamıza maraqlı məlumatlar daxil olub. Ərazidə həyata keçirilən tikinti işləri, tikintiyə rəhbərlik etdiyi bildirilən “Qazaxlı Faiq” adlı şəxs və burada çalışan fəhlələrin əmək və texniki təhlükəsizlik qaydalarına əməl edib-etməməsi ilə bağlı ciddi suallar yaranıb.

Məsələ ondadır ki, hər hansı tikinti obyektinin qanunvericiliyin tələblərinə uyğun şəkildə inşa edilməsi, müvafiq icazə və sənədlərinin olması, eləcə də tikinti prosesində təhlükəsizlik qaydalarına riayət olunması mühüm şərtlərdən biridir. Dövlət Şəhərsalma və Arxitektura Komitəsinin rəsmi resursunda tikinti obyektlərinin tikintisinə və istismarına icazənin alınması üçün elektron xidmətlərin, həmçinin tikilən, istismar edilən və sökülən tikinti obyektlərinin dövlət reyestrinin mövcud olduğu göstərilir.

Bu baxımdan Bilgəh qəsəbəsi, Azərbaycan qadını küçəsində aparılan tikintinin hansı hüquqi əsaslarla həyata keçirilməsi ictimai maraq doğurur.

Redaksiyaya təqdim olunan məlumatlarda tikintidə çalışan bəzi fəhlələrin texniki təhlükəsizlik qaydalarına lazımi səviyyədə əməl etmədiyi iddia olunur. Əgər bu məlumatlar doğrudursa, burada çalışan insanların həyat və sağlamlığının qorunması ilə bağlı ciddi məsələ ortaya çıxır. Tikinti sahəsində təhlükəsizlik tədbirlərinin görülməsi, işçilərin müvafiq qoruyucu vasitələrlə təmin edilməsi və təhlükəli işlərin müəyyən olunmuş qaydalara uyğun aparılması xüsusilə vacibdir.

Digər tərəfdən, tikintiyə rəhbərlik etdiyi bildirilən “Qazaxlı Faiq” adlı şəxsin obyektlə bağlı hansı hüquqi statusa malik olduğu da aydınlaşdırılmalıdır. O, tikinti sifarişçisidir, podratçıdır, sahə rəhbəridir, yoxsa başqa funksiyanı yerinə yetirir? Tikinti işlərini həyata keçirən şəxsin və ya şirkətin adı, obyektin layihəsi, tikintiyə icazə sənədi və digər zəruri sənədləri mövcuddurmu?

Ən mühüm suallardan biri də budur: Bakı şəhəri, Sabunçu rayonu, Bilgəh qəsəbəsi, Azərbaycan qadını küçəsində aparılan bu tikintidən aidiyyəti dövlət qurumlarının xəbəri varmı?

Dövlət Şəhərsalma və Arxitektura Komitəsi yanında müvafiq qurumların, Sabunçu Rayon İcra Hakimiyyətinin, Fövqəladə Hallar Nazirliyinin və digər aidiyyəti dövlət strukturlarının bu obyektlə bağlı hər hansı araşdırma aparıb-aparmadığı ictimaiyyət üçün maraqlıdır.

Əgər tikintinin bütün zəruri sənədləri mövcuddursa, onların qanunvericiliyin tələblərinə uyğunluğu barədə açıqlama verilməsi məqsədəuyğun olardı. Əksinə, hər hansı sənəd çatışmazlığı, icazəsiz tikinti və ya təhlükəsizlik qaydalarının pozulması müəyyən edilibsə, bununla bağlı hansı tədbirlərin görüldüyü də açıqlanmalıdır.

Redaksiyamız qeyd olunan məlumatları hazırda təsdiqlənmiş fakt kimi təqdim etmir və məsələ ilə bağlı aidiyyəti qurumların mövqeyini öyrənməyə çalışır.

Bu səbəbdən Dövlət Şəhərsalma və Arxitektura Komitəsinə, Sabunçu Rayon İcra Hakimiyyətinə, Fövqəladə Hallar Nazirliyinə və digər aidiyyəti qurumlara müraciət edərək aşağıdakı suallara rəsmi cavab gözləyirik:

Bilgəh qəsəbəsi, Azərbaycan qadını küçəsində aparılan tikinti ilə bağlı aidiyyəti qurumlarda hər hansı məlumat və ya müraciət varmı?

Obyektin tikintisinə icazə verilibmi?

Tikintinin layihə və digər zəruri sənədləri mövcuddurmu?

Tikintiyə rəhbərlik etdiyi bildirilən “Qazaxlı Faiq”in obyektə hansı əsasla rəhbərlik etdiyi məlumdurmu?

Tikinti sahəsində texniki təhlükəsizlik qaydalarına əməl olunması yoxlanılıbmı?

İşçilərin əmək münasibətləri və təhlükəsizlik təminatı ilə bağlı hər hansı yoxlama aparılıbmı?

Obyekt üzrə indiyədək hər hansı inzibati tədbir görülübmü?

İctimaiyyətin məlumatlandırılması baxımından aidiyyəti qurumların rəsmi mövqeyini dərc etməyə hazırıq. Çünki tikinti sahəsində qanunçuluğun və insan təhlükəsizliyinin təmin olunması yalnız obyekt sahibinin deyil, nəzarət edən qurumların da diqqət mərkəzində olmalı olan məsələdir.

Adıçəkilənlərin mövqeyini dərc etməyə hazırıq.

Xezertv.info