QANUNSUZ TİKİNTİLƏRƏ GÖZ YUMULUR: ABŞERONDA KİM KİMİ QORUYUR?

“Xezertv.info”ya daxil olan məlumata əsasən Abşeron rayonu, Digah qəsəbəsi, Hüseyn Rəhmanov küçəsində aparılan tikinti işləri ciddi suallar doğurur. İlkin müşahidələr göstərir ki, sözügedən tikinti qanunvericiliyin tələblərinə zidd şəkildə həyata keçirilir. Redaksiyamızın əməkdaşları məsələni yerində araşdırmaq üçün əraziyə yaxınlaşsalar da, tikintini aparan məsul şəxslə əlaqə qurmaq mümkün olmayıb. Ərazidə çalışan fəhlələrdən birinin dedikləri isə vəziyyətin nə qədər qaranlıq olduğunu açıq şəkildə ortaya qoyur: guya tikintinin sahibi tapşırıb ki, bu barədə heç kimə məlumat verilməsin.

Bu faktın özü artıq ciddi hüquq pozuntusunun göstəricisidir. Əgər tikinti qanunidirsə, niyə gizlədilir? Niyə tikintiyə dair lövhə yoxdur, icazə sənədləri açıq şəkildə nümayiş etdirilmir? Daha da maraqlısı odur ki, Abşeron Rayon İcra Hakimiyyəti və Dövlət Şəhərsalma və Arxitektura Komitəsinin bu tikintidən xəbərdar olub-olmaması sual altındadır. Yoxsa xəbərdardırlar, sadəcə susmağa üstünlük verirlər?

Son illər Abşeron ərazisində qanunsuz tikintilərin artması artıq sistemli problemə çevrilib. Aidiyyəti qurumların vaxtında reaksiya verməməsi, nəzarət mexanizmlərinin formal xarakter daşıması və məsuliyyətin paylaşdırılmaması bu cür halların davamlı olmasına şərait yaradır. Qanun hamı üçün eyni deyilsə, bu, cəmiyyətə verilən ən təhlükəli mesajdır.

Aidiyyəti dövlət qurumlarını məsuliyyətə çağırır, Digah qəsəbəsində aparılan bu tikinti ilə bağlı dərhal araşdırma aparılmasını və ictimaiyyətə aydın, rəsmi açıqlama verilməsini tələb edirik. Susqunluq isə sualları daha da artırır.

Qarşı tərəflərin mövqeyini tanıyırıq.