Bakının göbəyində qanunsuz tikinti: Bakıxanovda kimlər himayə edir? FOTO/Video

“Xezertv.info”ya daxil olan məlumata əsasən, Bakı şəhəri Bakıxanov qəsəbəsinin yaxınlığında qanunsuz bina inşa edildiyi iddia olunur. Bildirilir ki, sözügedən tikinti heç bir rəsmi icazə sənədi olmadan aparılır və artıq ərazi sakinləri arasında ciddi narahatlıq doğurmaqdadır. Aldığımız məlumatlara görə, binanın inşasını Gülnarə adlı xanım həyata keçirir.

Ən diqqətçəkən məqam isə odur ki, tikinti prosesi açıq şəkildə davam etdiyi halda, aidiyyəti dövlət qurumlarının bu qanunsuzluğa niyə göz yumduğu sual altındadır. Şəhərsalma və Tikinti Məcəlləsinin tələblərinə zidd olan bu cür hallara qarşı indiyədək hər hansı rəsmi müdaxilənin olmaması ictimaiyyətdə haqlı narazılıq yaradır.

Məsələ ilə bağlı Bakı Şəhər İcra Hakimiyyəti, Dövlət Şəhərsalma və Arxitektura Komitəsi, eləcə də digər nəzarət qurumlarının mövqeyi maraq doğurur. Qanunsuz tikintilərə qarşı prinsipial mövqe haradadır və qanun hamı üçün eynidirmi?

“Xezertv.info” olaraq aidiyyəti qurumlardan rəsmi açıqlama gözləyirik. Qarşı tərəfin mövqeyini dərc etməyə və mövzunu diqqətdə saxlamağa hazırıq.

Araşdırmalarımız davam edir. Bizi izləyin.