Prezidentlə Baş nazirin liderlik mübahisəsi NATO Zirvəsinədək uzandı

NATO-nun Ankarada keçirilən 36-cı Dövlət və Hökumət Başçıları Zirvəsində diqqətçəkən hadisələrdən biri də Çexiyanın təmsilçilik böhranı olub.

“Qafqazinfo” xəbər verir ki, Prezident Petr Pavel və Baş nazir Andrey Babiş arasında yaranan səlahiyyət mübahisəsi səbəbindən ölkə zirvədə iki ayrı lider tərəfindən təmsil olunub.

Çexiya NATO sammitində eyni vaxtda həm prezident, həm də baş nazir səviyyəsində iştirak edən yeganə üzv ölkə kimi diqqət çəkib. İki lider Ankaraya ayrı-ayrı dövlət təyyarələri ilə gəlib və zirvə çərçivəsində keçirilən ənənəvi ailə fotosunda bir-birindən xeyli aralı dayanaraq siyasi gərginliyi nümayiş etdirib.

Mübahisənin əsasında Baş nazir Andrey Babişin NATO Zirvəsində ölkəsini özünün, müdafiə naziri və xarici işlər nazirinin təmsil edəcəyini açıqlaması, Prezident Petr Paveli isə rəsmi nümayəndə heyətinə daxil etməməsi dayanıb.

Prezident Pavel bu qərardan sonra məsələni Çexiyanın Konstitusiya Məhkəməsinə çıxarıb. Məhkəmənin verdiyi müvəqqəti qərar prezidentin Ankaradakı NATO Zirvəsində iştirakına imkan yaradıb.

Keçmiş NATO hərbi rəhbərlərindən biri olan Petr Pavel sammitdə müttəfiq ölkələrin liderləri ilə birbaşa təmasların qurulmasının və müzakirələrdə iştirakın dövlət başçısı kimi konstitusion səlahiyyətlərinə daxil olduğunu bildirib.

Praqada başlayan siyasi qarşıdurma Ankarada da özünü göstərib. İki lider sammitə ayrı-ayrı təyyarələrlə gəlib, rəsmi tədbirlərdə isə məsafəli davranışları ilə diqqət çəkiblər. NATO-nun ənənəvi ailə fotosunda Pavel və Babiş bir-birinin yanında dayanmaqdan yayınaraq podiumun əks tərəflərində yer alıblar.