Qalib ordunun şanlı salnaməsi

Məşhur Məmmədov

Milli Məclisin deputatı

Tarix göstərir ki, müstəqillik təkcə siyasi akt deyil, həm də onu qorumağa qadir olan güclü ordunun mövcudluğu ilə möhkəmlənən bir dəyərdir.

Dövlətin sərhədlərini, xalqın təhlükəsizliyini və milli maraqlarını təmin edən əsas institutlardan biri Silahlı Qüvvələrdir. Məhz buna görə də hər il qeyd olunan 26 İyun – Azərbaycan Respublikasının Silahlı Qüvvələri Günü peşə bayramı ilə yanaşı, dövlətçilik tariximizin, milli təhlükəsizliyimizin və suverenliyimizin simvoludur.

Bu gün Azərbaycan Ordusu regionun ən güclü silahlı qüvvələrindən biri, dünyanın qabaqcıl orduları sırasında yer alan peşəkar hərbi gücdür. Bu səviyyəyə çatmaq isə təsadüf deyil. Onilliklər ərzində həyata keçirilən ardıcıl dövlət siyasəti, peşəkar kadr hazırlığı, müasir silahlanma, beynəlxalq əməkdaşlıq və hər şeydən önəmlisi, xalq–ordu birliyi bu uğurun əsas sütunlarını təşkil edir.

Azərbaycanın ordu quruculuğunun müasir tarixi Ulu Öndər Heydər Əliyevin adı ilə ayrılmaz şəkildə bağlıdır. Hələ 1969-cu ildən etibarən onun təşəbbüsü ilə ölkədə milli hərbi kadrların hazırlanmasına başlanıldı. 1971-ci ildə Cəmşid Naxçıvanski adına Hərbi Liseyin yaradılması gələcək milli zabit korpusunun formalaşmasına mühüm təkan verdi. Azərbaycanlı gənclərin SSRİ-nin nüfuzlu hərbi məktəblərində təhsil alması üçün yaradılan imkanlar sonradan müstəqil Azərbaycanın peşəkar zabit heyətinin əsasını təşkil etdi.

1991-ci ildə dövlət müstəqilliyini bərpa edən Azərbaycan, eyni zamanda ağır hərbi-siyasi problemlərlə üzləşdi. Ermənistanın hərbi təcavüzü, daxildə siyasi böhran və nizamsız silahlı dəstələrin fəaliyyəti ölkənin müdafiə sistemini iflic vəziyyətə salmışdı. 1993-cü ildə xalqın tələbi ilə hakimiyyətə qayıdan Ulu Öndər Heydər Əliyev ilk növbədə nizami ordu quruculuğunu prioritet elan etdi. Başıpozuq silahlı dəstələr ləğv edildi, vahid komandanlıq sistemi yaradıldı, orduda nizam-intizam bərpa olundu və peşəkar hərbi idarəetmənin əsası qoyuldu.

1994-cü ildə atəşkəsin əldə olunması ordu quruculuğunun yeni mərhələsinə yol açdı. Maddi-texniki təminat gücləndirildi, hərbi hissələr yenidən formalaşdırıldı, döyüş hazırlığı yüksəldildi, şəxsi heyətin sosial müdafiəsi diqqət mərkəzinə gətirildi. 1998-ci ildə isə 26 iyun tarixinin Silahlı Qüvvələr Günü elan edilməsi dövlətin orduya verdiyi xüsusi dəyərin göstəricisinə çevrildi.

Azərbaycan Ordusunun inkişafında növbəti mühüm mərhələ Prezident, Silahlı Qüvvələrin Ali Baş Komandanı İlham Əliyevin rəhbərliyi dövrünə təsadüf edir. Son iyirmi ildən artıq müddətdə ordu quruculuğu dövlət siyasətinin əsas prioritetlərindən biri kimi müəyyənləşdirildi. Müdafiə büdcəsi dəfələrlə artırıldı, ən müasir silah və hərbi texnika alındı, yerli hərbi sənaye kompleksi yaradıldı, minlərlə adda müdafiə təyinatlı məhsulun istehsalına başlanıldı.

Ordunun yalnız silahla güclənmədiyi hər zaman diqqətdə saxlanıldı. Hərbçilərin sosial müdafiəsi gücləndirildi, mənzil təminatı proqramları həyata keçirildi, maaş və təminat sistemi təkmilləşdirildi. Paralel olaraq hərbi təhsil sistemi yenidən quruldu, Milli Müdafiə Universiteti yaradıldı, yeni institutlar və kolleclər fəaliyyətə başladı. Müasir döyüşlərin tələblərinə uyğun zabit və komando hazırlığı artıq Azərbaycan Ordusunun əsas üstünlüklərindən birinə çevrilib.

Azərbaycan Ordusunun inkişafında beynəlxalq hərbi əməkdaşlıq da mühüm rol oynayır. NATO proqramları çərçivəsində əldə olunan təcrübə, Türkiyə ilə strateji hərbi tərəfdaşlıq, Pakistan, İsrail və digər dost ölkələrlə hərbi-texniki əməkdaşlıq ordumuzun peşəkarlığını daha da artırıb. Xüsusilə Türkiyə Silahlı Qüvvələrinin modeli əsasında həyata keçirilən islahatlar idarəetmə, hazırlıq və döyüş qabiliyyətində yeni keyfiyyət mərhələsi formalaşdırıb.

2016-cı ilin Aprel döyüşləri Azərbaycan Ordusunun artıq əvvəlki ordu olmadığını bütün dünyaya nümayiş etdirdi. Ardınca 2018-ci ildə Günnüt əməliyyatı ordumuzun taktiki üstünlüyünü və peşəkarlığını bir daha sübut etdi. Lakin Azərbaycan hərb tarixinin ən parlaq səhifəsi 2020-ci ilin 44 günlük Vətən müharibəsi oldu.

Müzəffər Ali Baş Komandan İlham Əliyevin rəhbərliyi altında Azərbaycan Ordusu cəmi 44 gün ərzində tarixi Qələbə qazandı, ölkənin ərazi bütövlüyünün böyük hissəsini bərpa etdi, işğal altında olan şəhər və kəndləri azad etdi. Bu müharibə təkcə hərbi qələbə deyil, eyni zamanda müasir döyüş strategiyasının, yüksək texnologiyaların və peşəkar idarəetmənin uğurlu sintezi kimi dünya hərb tarixində öz yerini aldı.

2023-cü ilin sentyabrında keçirilən lokal antiterror tədbirləri isə Azərbaycanın bütün ərazisində dövlət suverenliyinin tam təmin olunması ilə nəticələndi. Cəmi 23 saat 43 dəqiqə davam edən əməliyyat yüksək peşəkarlıq, dəqiq planlaşdırma və müasir hərbi imkanların real göstəricisinə çevrildi.

Bu gün Azərbaycan Ordusu yalnız silahlı qüvvə deyil, həm də dövlətçiliyin dayağı, milli həmrəyliyin rəmzi və xalqın qürur mənbəyidir. Ordunun gücü yalnız müasir silahlarla ölçülmür. Onun əsas qüvvəsi Vətən sevgisi, peşəkar hazırlıq, intizam, milli birlik və xalqın öz ordusuna sonsuz etimadıdır.

26 İyun münasibətilə bütün hərbi qulluqçularımızı, qazilərimizi, veteranlarımızı ürəkdən təbrik edir, Vətən uğrunda canından keçən şəhidlərimizin əziz xatirəsini dərin ehtiramla yad edirik. Onların qəhrəmanlığı sayəsində bu gün Azərbaycan qalib dövlət, qalib xalq və güclü orduya sahib ölkə kimi öz tarixinin ən şərəfli mərhələsini yaşayır. Azərbaycan Ordusu bundan sonra da dövlətimizin müstəqilliyinin, ərazi bütövlüyünün və xalqımızın təhlükəsizliyinin etibarlı təminatçısı olaraq öz şərəfli missiyasını qətiyyətlə davam etdirəcək.