Millət vəkili Məşhur Məmmədov: “Seçiciləri maraqlandıran məsələlərin ən qısa zamanda həlli bizim üçün prioritetdir”

Milli Məclisin deputatı Məşhur Məmmədov Masallı rayonunda növbəti vətəndaş qəbulunu keçirib. Yay mövsümünün başlanması ilə əlaqədar seçicilərlə görüş və qəbulların davam etdirildiyini bildirən deputat vətəndaşların müraciətlərinin operativ şəkildə araşdırılması və həllinə xüsusi önəm verildiyini vurğulayıb.

YAP Masallı rayon təşkilatının inzibati binasında keçirilən qəbulda rayon sakinləri fərdi qaydada dinlənilib, onları narahat edən sosial, məişət və digər məsələlər ətrafında müzakirələr aparılıb.

Qəbulda YAP Masallı rayon təşkilatının sədri Seyfəddin Əliyev, Masallı Rayon İcra Hakimiyyətinin Şəhid ailələri və qazilərlə iş şöbəsinin müdiri Qəşəm Hadıyev, eləcə də "Masallı Təhsil Fondu"nun icraçı direktoru Hüseyn Hüseynov iştirak ediblər. Görüş zamanı qaldırılan məsələlərin bir qismi yerindəcə həll olunub, digər müraciətlər isə aidiyyəti qurumlara yönləndirilib.

Məşhur Məmmədov bildirib ki, vətəndaşların problemlərinin vaxtında həlli, onların təklif və müraciətlərinin diqqətdə saxlanılması əsas fəaliyyət istiqamətlərindən biridir. Deputat qeyd edib ki, qəbullarda rayonun məsul şəxslərinin iştirakı müraciətlərin daha operativ araşdırılmasına və həllinə imkan yaradır.

Qəbul zamanı çıxış edən sakinlər də onların müraciətlərinə göstərilən diqqəti yüksək qiymətləndirərək, problemlərinin dinlənilməsi və həlli istiqamətində atılan addımlara görə minnətdarlıqlarını ifadə ediblər.

Qeyd edək ki, deputat Məşhur Məmmədovun Masallı rayonunda seçicilərlə görüş və qəbulları mütəmadi xarakter daşıyır və qarşıdakı dövrdə də davam etdiriləcək.