74 saylı Masallı Şəhər Seçki Dairəsinin deputatı Məşhur Məmmədov seçicilərlə görüş keçirdi

İlaxır çərşənbəyə saylı günlər qalmış 74 saylı Masallı Şəhər Seçki Dairəsinin deputatı Məşhur Məmmədov seçicilərlə növbəti qəbul-görüşünü keçirib. Görüş Yeni Azərbaycan Partiyasının (YAP) Masallı Rayon Təşkilatının inzibati binasında baş tutdu. Tədbirdə YAP Masallı Rayon Təşkilatının sədri Seyfəddin Əliyev və deputatın köməkçiləri də iştirak edib.
Azadmedia az xəbər verir ki, keçirilən qəbul-görüş barədə millət vəkili Məşhur Məmmədov sosial media hesabında məlumat verib.
Qəbulda 21 seçici iştirak edib. Görüşə qatılanlar arasında şəhid ailələrinin üzvləri də olub. Deputat şəhid anasının müraciətini xüsusi diqqətlə dinləyərək, ona dəstək göstərilməsinin vacibliyini vurğulayıb.

Seçicilərin qaldırdığı məsələlər əsasən sosial və məişət xarakterli idi. Bayram ərəfəsində edilən müraciətlərin əksəriyyəti vətəndaşların rifahı və sosial təminat məsələləri ilə bağlı olub. Deputat bildirib ki, son illərdə vətəndaşlar arasında maarifləndirmə səviyyəsi artıb. Artıq vətəndaşlar problemlərinin həlli üçün aidiyyəti dövlət qurumlarına necə müraciət etməyi və tələb olunan prosedurlara əməl etməyi daha yaxşı bilirlər.

Millət vəkili Məşhur Məmmədov vurğulayıb ki, bayram ərəfəsində hər kəsi razı salmağa və seçicilərin müraciətlərinə mümkün olan maksimum dəstəyi verməyə çalışıblar. Onun səlahiyyətləri çərçivəsində həll edilə biləcək məsələlər yerindəcə həll edilib, digərləri isə aidiyyəti qurumlara yönləndirilib. Deputatın köməkçiləri həmin müraciətlərin icrasını diqqətdə saxlayacaq.

Seçicilərlə görüşlərin davamlı olacağını qeyd edən deputat, gələcəkdə də Masallı rayonunun inkişafı və vətəndaşların sosial rifahının yaxşılaşdırılması istiqamətində fəaliyyətini davam etdirəcəyini bildirib.