“Qurtuluşdan Zəfərə uzanan dövlətçilik yolu: Heydər Əliyev strategiyasından İlham Əliyev liderliyinə”

Yeni Azərbaycan Partiyası (YAP) Səbail rayon təşkilatının keçirdiyi “Qurtuluş məfkurəsi: xilaskarlıq missiyasından Zəfər salnaməsinə” adlı tədbir mühüm ictimai-siyasi əhəmiyyətə malik bir görüş kimi yadda qalmışdır. Tədbir Azərbaycanın müasir dövlətçilik tarixində dönüş nöqtəsi olan 15 İyun – Milli Qurtuluş Gününün ideoloji mahiyyətini, həmçinin bu tarixi mərhələnin ölkənin bugünkü inkişafına uzanan yolunu əhatəli şəkildə əks etdirmişdir.

Tədbirdə iştirak edən natiqlər tərəfindən Qurtuluş Gününün Azərbaycanın dövlət müstəqilliyinin möhkəmləndirilməsində, sabitliyin bərpasında və milli inkişaf strategiyasının formalaşmasında oynadığı rol xüsusi vurğulanmışdır. Bildirilmişdir ki, həmin dövrdə atılan qətiyyətli addımlar ölkəni dərin böhrandan xilas etmiş, sonrakı illərdə isə davamlı inkişaf və güclü dövlət quruculuğu üçün möhkəm təməl yaratmışdır.

Ümumilikdə tədbir yüksək təşkilatçılığı, ideoloji məzmununun zənginliyi və iştirakçıların fəallığı ilə seçilmiş, “Qurtuluşdan Zəfərə” uzanan inkişaf yolunun mahiyyətini bir daha ictimaiyyətə nümayiş etdirmişdir. Belə tədbirlər gənclərin milli şüurunun möhkəmlənməsinə, dövlətçilik dəyərlərinə bağlılığın güclənməsinə və ictimai fəallığın artırılmasına mühüm töhfə verir.

Azərbaycan xalqının dövlətçilik tarixində elə şəxsiyyətlər var ki, onların fəaliyyəti təkcə bir dövrü deyil, bütöv bir tarixi mərhələni müəyyən edir. Bu baxımdan Ümummilli Lider Heydər Əliyev Azərbaycan dövlətçiliyinin formalaşmasında və möhkəmləndirilməsində misilsiz xidmətlər göstərmiş böyük tarixi şəxsiyyətdir. Onun uzaqgörən siyasəti nəticəsində ölkədə sabitlik təmin olunmuş, dövlət institutları gücləndirilmiş, Azərbaycanın gələcək inkişafı üçün möhkəm təməl yaradılmışdır. Heydər Əliyevin xalqla birliyi, dövlətə sadiqliyi və idarəçilik təcrübəsi Azərbaycanın müasir tarixində dönüş nöqtəsi olmuş, ölkəni parçalanma təhlükəsindən xilas edərək inkişaf yoluna çıxarmışdır.

Bu gün Azərbaycan dövlətinin əldə etdiyi uğurların arxasında məhz həmin uzaqgörən siyasətin dayandığını xüsusi qeyd etmək lazımdır. Ulu Öndərin müəyyən etdiyi strateji yol dövlətçiliyimizin ideoloji əsasını təşkil edir və bu xətt bu gün də uğurla davam etdirilir.

Azərbaycan Respublikasının Prezidenti İlham Əliyev isə bu siyasətin ən layiqli davamçısı kimi ölkəmizin inkişafını yeni mərhələyə yüksəltmişdir. Onun rəhbərliyi ilə Azərbaycan iqtisadi, siyasi və beynəlxalq sahələrdə mühüm nailiyyətlər əldə etmiş, ölkənin nüfuzu dünya miqyasında daha da artmışdır. Prezident İlham Əliyevin qətiyyətli mövqeyi, məqsədyönlü islahatları və milli maraqlara əsaslanan siyasəti nəticəsində Azərbaycan regionda güclü və söz sahibi olan dövlətə çevrilmişdir.

Eyni zamanda, Prezidentin rəhbərliyi ilə həyata keçirilən gənclər siyasəti, sosial-iqtisadi inkişaf proqramları və dövlət idarəçiliyində müasir yanaşmalar ölkənin gələcəyini daha da etibarlı edir. Xüsusilə Vətən müharibəsində əldə olunan tarixi Zəfər Azərbaycan dövlətinin gücünü, xalq–dövlət birliyinin möhkəmliyini və düzgün strateji idarəçiliyin nəticəsini bütün dünyaya nümayiş etdirdi.

Ümumilikdə qeyd etmək olar ki, Heydər Əliyevin yaratdığı möhkəm dövlətçilik ənənələri və İlham Əliyevin bu xətti uğurla davam etdirməsi Azərbaycanın bugünkü inkişafının əsas dayağıdır. Bu siyasi kurs ölkəmizin gələcək inkişafına inam yaradır və hər bir vətəndaş üçün qürur mənbəyidir.

ARHD.media informasiya agentliyinin rəhbəri

Beynəlxalq hüquq eksperti

Beynəlxalq hüquq müdafiəçisi

Hüquq üzrə fəlsəfə doktoru

İsmayıl Zalov