Ruslan Nəsrullayev: “Mən bir qəhrəman tanıyıram...”

Bəzən insan həyatda elə insanlarla qarşılaşır ki, onların adı sadəcə bir şəxsiyyət kimi deyil, bütöv bir xarakter, mərdlik və vətən sevgisinin simvolu kimi yadda qalır. Belə insanlar zaman keçsə də unudulmur, çünki onlar yaşadıqları ömürlə başqalarından fərqlənirlər. Mən də belə bir qəhrəman tanıyıram. Mənim üçün adı hər zaman qürurla çəkilən, cəsarəti ilə seçilən, Vətən sevgisini ürəyində daşıyan bir insan – əziz qardaşım, Azərbaycanın igid oğlu Şərafəddin Xankişiyev... Döyüş yoldaşlarının ona verdiyi adla desək – Xanış...

Xanış adı onun üçün sadəcə bir kod adı deyildi. Bu ad zamanla qorxmazlığın, mərdliyin və qəhrəmanlığın simvoluna çevrildi. Çünki Şərafəddin Xankişiyev adi insanlardan deyil. O, Vətən deyəndə gözləri alışan, torpaq deyəndə ürəyi daha sürətlə döyünən insanlardandı. Belə oğullar hər əsrdə doğulmur. Onlar bir millətin ruhunu yaşadan, xalqın qüruruna çevrilən insanlardır.

Mən Şərafəddin Xankişiyevi tanıyanda ilk diqqətimi çəkən onun sadəliyi oldu. Hər zaman təmkinli danışığı, səmimi münasibəti və insanlara olan hörməti onu hamıya sevdirir. O, özünü heç vaxt başqalarından üstün tutmur. Amma onu yaxından tanıyan hər kəs anlayır ki, bu sadəliyin arxasında böyük bir ürək, polad kimi möhkəm xarakter dayanır.

Onun ən böyük sevgisi Vətəndi. Bu sevgini sözlə yox, əməli ilə göstərir. Çünki bəzi insanlar Vətəni sevdiyini danışır, bəziləri isə onu yaşadır. Şərafəddin Xankişiyev Vətəni yaşayan insanlardandı. O, torpağa bağlıdı. Qarabağ adı çəkiləndə gözlərində başqa bir işıq yaranır. Çünki o, Qarabağı yalnız xəritədə bir ərazi kimi yox, xalqın qüruru, şəhidlərin əmanəti kimi görür.

2020-ci ilin o taleyüklü günləri başlayanda Azərbaycan xalqı ayağa qalxdı. Hər kəs bir amal uğrunda birləşdi – Qarabağı azad görmək uğrunda. O günlərdə milyonlarla insan dua edir, Azərbaycan əsgəri isə döyüş meydanında tarix yazırdı. Həmin tarixi yazan qəhrəmanlardan biri də Xanış idi.

44 günlük Vətən müharibəsi Azərbaycan xalqının iradəsini, gücünü və birliyini bütün dünyaya göstərdi. Bu müharibə təkcə silahlı savaş deyildi. Bu, haqqın savaşı idi. Bu savaşda Azərbaycan əsgəri öz canı, qanı bahasına torpaqları azad etdi. Şərafəddin Xankişiyev də həmin müqəddəs savaşın önündə gedən igidlərdən biridi.

Döyüş yoldaşları onun haqqında danışanda hər zaman bir şeyi vurğulayırlar – qorxmazlıq. Ən çətin məqamlarda belə geri çəkilməyən, təhlükənin gözünə dik baxan, döyüş yoldaşlarını heç vaxt tək qoymayan bir insandı Xanış. O, öz həyatını düşünmədən Vətən uğrunda irəli atılırdı. Çünki onun üçün Vətənin azadlığı hər şeydən üstündü.

Şuşaya gedən yolların necə çətin olduğunu hər kəs bilir. Dağlar, qayalar, sərt hava şəraiti... Amma Azərbaycan əsgəri bütün bunları aşdı. Çünki onların qarşısında yalnız bir məqsəd vardı – Zəfər! Şərafəddin Xankişiyev də həmin qəhrəmanlıq yolunun önündə gedənlərdəndi. O, sübut etdi ki, Azərbaycan oğulları torpaq uğrunda ölümün üzərinə belə gedə bilirlər.

Onun haqqında düşünəndə ağlıma ilk gələn sözlərdən biri də “etibar” olur. Çünki Xanış etibarlı insandı. Dostluqda da, döyüşdə də, insanlıqda da... Belə insanlar çox olmur. O, döyüş yoldaşlarının güvəndiyi, arxasını söykədiyi insanlardandı. Onun yanında olan hər kəs özünü güvəndə hiss edir.

Şərafəddin Xankişiyev təkcə döyüş meydanında deyil, gündəlik həyatda da böyük ürəyə sahib insandı. İnsanlara qarşı qayğıkeş münasibəti, böyüyə hörməti, kiçiyə sevgisi onu fərqləndirir. O, heç vaxt özünü düşünməz, hər zaman başqalarının dərdi ilə maraqlanar, yardım etməyə çalışır. Elə buna görə də onu tanıyan hər kəs Xanışı sevir.

Qəhrəmanlıq yalnız silah tutmaq deyil. Qəhrəmanlıq insanın xarakterində olur. Şərafəddin Xankişiyevin qəhrəmanlığı da məhz onun xarakterindədi. O, mərddi. Dürüsdü. Vətəninə sonsuz bağlıdı. Belə insanlar tarix yazırlar. Çünki onların həyatı adi ömür olmur. Onların həyatı xalqın yaddaşına çevrilir.

Bu gün Azərbaycan xalqı öz qəhrəman oğulları ilə fəxr edir. Şərafəddin Xankişiyev də həmin qəhrəmanlardan biridir. Onun adı mərdlik, vətənpərvərlik və cəsarətlə birgə çəkilir. Çünki o, Vətən uğrunda yaşayan insanlardandır.

Bəzən insan düşünür ki, qəhrəmanlar yalnız kitablarda olur. Amma yox... Bu torpaq hələ də qəhrəman oğullar yetişdirir. Xanış kimi oğullar Azərbaycan xalqının ruhunu yaşadır. Onlar göstərirlər ki, bu xalq heç vaxt əyilməyəcək. Çünki onun damarlarında qəhrəmanlıq qanı axır.

Mən fəxr edirəm ki, belə bir insanı tanıyıram.
Mən fəxr edirəm ki, Şərafəddin Xankişiyev kimi Vətən oğulları bu torpağın yetirməsidir.
Mən fəxr edirəm ki, Xanış kimi igidlər Azərbaycanın şanlı tarixini öz qəhrəmanlığı ilə yazdılar.

Zaman keçəcək...
İllər ötəcək...
Nəsillər dəyişəcək...
Amma qəhrəmanların adı heç vaxt unudulmayacaq.

Çünki qəhrəmanlar yalnız yaşayan insanlar deyil.
Onlar xalqın yaddaşıdır.
Onlar millətin qürurudur.
Onlar Vətənin döyünən ürəyidir.

Şərafəddin Xankişiyev də məhz belə qəhrəmanlardandır.
O, bu xalqın qürurudur.
O, Vətənin igid oğludur.
O, canlı əfsanədir.

Və mən bir qəhrəman tanıyıram...
Adı Şərafəddin Xankişiyevdir.
Kod adı isə – Xanış...

Ruslan Nəsrullayev

Əmək və Əhalinin Sosial Müdafiəsi Nazirliyi - Dövlət Məşğulluq Agentliyi