Tibb üzrə fəlsəfə doktoru, estetik cərrah Dilqəm Məhərrəmov: “Gözlərə nur, qəlblərə işıq bəxş edən ömür-oftalmoloq Zərifə Əliyeva”

Azərbaycan tibb elminin inkişaf tarixində elə şəxsiyyətlər var ki, onların adı yalnız elmi nailiyyətlərlə deyil, həm də insanlığa xidmət nümunəsi ilə əbədiləşir. Belə böyük simalardan biri, görkəmli oftalmoloq, akademik Zərifə xanım Əliyevadır. Tibb üzrə fəlsəfə doktoru Dilqəm Məhərrəmovun da vurğuladığı kimi, Zərifə Əliyevanın həyat və fəaliyyəti Azərbaycan səhiyyəsinin ən parlaq səhifələrindən birini təşkil edir. O, öz zəngin elmi irsi, yüksək peşəkarlığı və insanlara sonsuz sevgisi ilə təkcə bir alim deyil, bütöv bir məktəb yaratmışdır.

Zərifə Əliyevanın həyat yolu elmə, biliyə və insan sağlamlığına xidmətin ən gözəl nümunəsidir. O, oftalmologiya sahəsində apardığı fundamental araşdırmalarla Azərbaycan tibb elmini yeni mərhələyə yüksəltmişdir. Göz insan orqanizminin ən həssas üzvlərindən biridir və onun sağlamlığı həyat keyfiyyətinin əsas şərtlərindən sayılır. Zərifə xanım bu sahədəki fəaliyyətini yalnız xəstəliklərin müalicəsi ilə məhdudlaşdırmamış, onların yaranma səbəblərini dərindən araşdıraraq profilaktik tədbirlərin hazırlanmasına xüsusi önəm vermişdir.

Onun elmi fəaliyyətinin mühüm istiqamətlərindən biri istehsalat və sənaye sahələrində çalışan insanlarda yaranan peşə ilə bağlı göz xəstəliklərinin öyrənilməsi idi. Kimya sənayesi, neft-qaz sektoru və digər ağır iş şəraitində çalışan insanların görmə orqanlarında baş verən dəyişikliklər Zərifə Əliyevanın xüsusi tədqiqat mövzusu olmuşdur. O, bu istiqamətdə apardığı araşdırmalar nəticəsində peşə patologiyasının oftalmoloji aspektlərini dərindən təhlil etmiş, bir çox xəstəliklərin qarşısının alınması üçün mühüm tibbi yeniliklər irəli sürmüşdür. Bu tədqiqatlar yalnız Azərbaycan üçün deyil, beynəlxalq tibb elmi üçün də dəyərli töhfə hesab olunmuşdur.

Zərifə Əliyevanın elmi uğurlarının əsas xüsusiyyətlərindən biri onun nəzəriyyə ilə praktikanı vəhdətdə birləşdirməsi idi. O, laboratoriyada əldə olunan nəticələrin birbaşa insan sağlamlığına xidmət etməsini vacib sayırdı. Buna görə də onun elmi fəaliyyəti minlərlə insanın sağlamlığının qorunmasına real təsir göstərmişdir. O, həkimlik peşəsinə yalnız bir ixtisas kimi deyil, müqəddəs missiya kimi yanaşırdı. Hər bir pasiyentin ağrısını öz qəlbində hiss edən Zərifə xanım üçün ən böyük uğur insanlara sağlamlıq bəxş etmək idi.

Dilqəm Məhərrəmovun qeyd etdiyi kimi, Zərifə Əliyevanı böyük edən yalnız onun elmi titulları deyildi. Onu ucaldan əsas keyfiyyətlərdən biri yüksək mənəviyyatı, sadəliyi və qayğıkeşliyi idi. O, insanlarla münasibətdə olduqca səmimi, diqqətli və mərhəmətli idi. Pasiyentlərinə yalnız həkim gözü ilə baxmır, onların mənəvi durumunu da nəzərə alırdı. Bu xüsusiyyətlər Zərifə Əliyevanı həm böyük alim, həm də əsl humanist kimi fərqləndirirdi.

Zərifə Əliyeva Azərbaycan qadınının intellektual gücünü və mənəvi zənginliyini öz şəxsiyyətində parlaq şəkildə təcəssüm etdirirdi. O, elmdə qazandığı böyük uğurlarla yanaşı, ailə dəyərlərinə bağlılığı, ana qayğısı və vətən sevgisi ilə də seçilirdi. Ulu öndər Heydər Əliyevin həyat yoldaşı olaraq ailəsində mənəvi dayaq rolunu oynayan Zərifə xanım, övladlarının tərbiyəsində də yüksək dəyərləri əsas götürmüşdür. Onun həyat fəlsəfəsində ailə, vətən və insanlıq anlayışları bir-birini tamamlayan müqəddəs dəyərlər idi.

Bu gün Zərifə Əliyevanın adı Azərbaycan səhiyyəsində böyük ehtiramla çəkilir. Onun elmi əsərləri, monoqrafiyaları və tibbi araşdırmaları gənc həkimlər üçün qiymətli mənbədir. O, yaratdığı elmi məktəblə gələcək nəsillərin inkişafına da mühüm töhfə vermişdir. Müasir oftalmologiyanın inkişafında onun qoyduğu elmi irs bu gün də yaşayır, yeni uğurlara yol açır.

Zərifə Əliyevanın həyat və fəaliyyəti bir daha göstərir ki, əsl böyüklük yalnız yüksək vəzifələrdə və elmi nailiyyətlərdə deyil, insanlara verilən dəyərdə, xalqa xidmətdə və mənəvi zənginlikdədir. O, gözlərə nur verməklə yanaşı, qəlblərə də işıq saçan bir ömür yaşadı. Onun adı bu gün milyonlarla insan üçün şəfqət, elm və insanlıq simvoludur.

Tibb üzrə fəlsəfə doktoru Dilqəm Məhərrəmovun da ifadə etdiyi kimi, Zərifə Əliyevanın həyat yolu Azərbaycan tibb tarixinin ən şərəfli səhifələrindəndir. O, öz fəaliyyəti ilə sübut etdi ki, həqiqi həkim olmaq üçün yalnız peşəkarlıq deyil, həm də böyük ürək, insan sevgisi və yüksək məsuliyyət lazımdır.

Zərifə Əliyeva bir alim kimi elmdə, bir oftalmoloq kimi səhiyyədə, bir insan kimi isə xalqın qəlbində əbədiyaşarlıq qazandı. Onun nurlu ömrü gələcək nəsillərə örnəkdir. Bu gün də onun adı Azərbaycan xalqının yaddaşında böyük sevgi və ehtiramla yaşayır. Çünki Zərifə Əliyeva yalnız bir dövrün böyük alimi deyil, zamanın fövqündə duran, insanlığa xidmət edən əbədi bir işıqdır.

Fərid Faiqoğlu