Gürcüstan XİN başçısı: "Azərbaycan-Ermənistan üzərindən yeni yolların tikintisi region üçün müsbət haldır"

"Bu gün Azərbaycan-Ermənistan üzərindən yeni yolların tikintisi fəal şəkildə müzakirə olunur və əminliklə demək olar ki, bu, region üçün müsbət haldır".

Oxu.Az İmedinews.ge-yə istinadən xəbər verir ki, bunu Gürcüstanın xarici işlər naziri Maka Boçorişvili deyib.

"Əgər bu proses inkişaf edərsə və regionumuza yeni yollar əlavə olunarsa, nəqliyyat əlçatanlığı baxımından bölgəmizin dəyəri daha da artacaq. Lakin təsəvvür etmək çətindir ki, uzun illərdir mövcud olan, işləyən və inkişaf edən marşrut - Gürcüstan üzərindən keçən hissə - hansısa yeni yolla tam əvəz olunsun", - deyə o vurğulayıb.

Nazirin sözlərinə görə, hətta üç və ya dörd yeni marşrut əlavə olunsa belə, Qərb ilə Şərq arasında bu gün baş verən yükdaşımaların həcmini tam qarşılamaq üçün onların yenə də kifayət etməməsi ehtimalı var:

"Buna görə bəzi dairələr Azərbaycan və Ermənistan arasındakı münasibətləri Gürcüstan kontekstində təqdim etməyə, mövzunu sanki rəqabət kimi göstərməyə çalışırlar. Halbuki biz bu prosesə müsbət baxırıq, bundan məmnunuq və yeni marşrutları Gürcüstan üzərindən keçən marşruta rəqib kimi qiymətləndirmirik".