Azərbaycan Respublikası – Hüquqi dövlətin güclü təməli

Azərbaycan Respublikası müstəqilliyini bərpa etdikdən sonra hüquqi dövlət quruculuğunu özünün əsas inkişaf istiqamətlərindən biri kimi müəyyənləşdirmişdir. Hüququn aliliyi, qanunun hamı üçün bərabərliyi və insan hüquq və azadlıqlarının qorunması dövlət siyasətinin prioritet xəttini təşkil edir.

Ümummilli lider Heydər Əliyev tərəfindən əsası qoyulan hüquqi islahatlar bu gün də uğurla davam etdirilir. Məhz onun rəhbərliyi ilə qəbul edilən Azərbaycan Respublikasının Konstitusiyası ölkəmizdə hüquqi dövlət modelinin möhkəm bünövrəsini yaratdı. Konstitusiya insan və vətəndaş hüquqlarının təminatını ali məqsəd kimi müəyyən etdi və dövlət hakimiyyətinin fəaliyyətini hüquq çərçivəsində tənzimlədi.

Bu gün İlham Əliyev rəhbərliyi ilə hüquqi dövlət quruculuğu yeni mərhələyə qədəm qoymuşdur. Məhkəmə-hüquq sistemində aparılan islahatlar, elektron xidmətlərin genişləndirilməsi, şəffaflığın artırılması və vətəndaş məmnunluğunun ön plana çəkilməsi dövlət siyasətinin əsas istiqamətlərindəndir.

Azərbaycanda fəaliyyət göstərən hüquq-mühafizə orqanları – polis, prokurorluq, məhkəmə və digər qurumlar – qanunun keşiyində ayıq-sayıq dayanaraq vətəndaşların təhlükəsizliyini və hüquqlarını yüksək səviyyədə qoruyurlar. Cinayətkarlığa qarşı mübarizədə qətiyyətli addımlar atılır, ictimai asayiş etibarlı şəkildə təmin olunur.

Son illər həyata keçirilən rəqəmsallaşma siyasəti hüquq-mühafizə orqanlarının fəaliyyətini daha operativ və əlçatan etmişdir. Elektron müraciət sistemləri, onlayn xidmətlər və “ASAN xidmət” modeli vətəndaş–dövlət münasibətlərində yeni keyfiyyət mərhələsi yaratmışdır. Bu model şəffaflıq, operativlik və vətəndaş məmnunluğu baxımından beynəlxalq səviyyədə də yüksək qiymətləndirilir.

Hüquqi dövlət yalnız qanunların mövcudluğu ilə deyil, həm də onların ədalətli və bərabər tətbiqi ilə güclənir. Azərbaycanda dövlət və vətəndaş arasında qarşılıqlı etimad mühiti formalaşmışdır. Hüquq-mühafizə orqanları öz fəaliyyətlərini vətəndaşlara xidmət prinsipi üzərində quraraq, insan hüquqlarının qorunmasını əsas vəzifə kimi qəbul edirlər.

Bu gün Azərbaycan Respublikası sabitlik, təhlükəsizlik və hüququn aliliyi baxımından regionun aparıcı dövlətlərindən biridir. Hüquqi dövlət prinsiplərinə sadiqlik, insan hüquqlarına hörmət və ədalətin təmin olunması ölkəmizin davamlı inkişafının əsas təminatıdır.

Azərbaycanın hüquqi dövlət modeli göstərir ki, güclü dövlət – güclü qanun və güclü ədalət deməkdir. Vətəndaşına xidmət edən, hüququn keşiyində dayanan bir dövlət isə daim inkişaf edəcək və daha da möhkəmlənəcəkdir.

ARHD.AZ ictimai-siyasi informasiya agentliyinin

Ağsu rayon üzrə xüsusi müxbiri: Ramil Abışov