“Marsda 50 il əvvəl həyat tapılıb”

Bəzi alimlər hesab edir ki, “Marsda həyat tapılmayıb” fikri NASA-nın 1976-cı ildə Marsa enən “Viking 1” və “Viking 2” missiyalarının məlumatlarının səhv şərh edilməsinə əsaslanır.

“Qafqazinfo” xəbər verir ki, həmin missiya çərçivəsində aparılan üç təcrübə müsbət nəticələr versə də, Qaz Xromatoqrafiyası–Kütlə Spektrometriyası cihazı üzvi molekulları aşkar etmədiyi üçün rəsmi nəticə həyatın mövcud olmaması kimi elan edilmişdi.

Lakin sonrakı illərdə Marsda güclü oksidləşdirici maddə olan perxloratın aşkar edilməsi və aparılan laboratoriya təcrübələri göstərib ki, üzvi maddələr qızdırılarkən məhv ola və yalnız karbon qazı ilə az miqdarda metil xlorid buraxa bilər. Bu isə “Viking” nəticələrinə alternativ izah verir.

Tədqiqatçılar hesab edirlər ki, əldə olunan məlumatlar yenidən qiymətləndirilməli və Marsda həyat ehtimalı açıq elmi müzakirəyə çıxarılmalıdır.