Pişiklə danışmaq normaldır? - Psixiatrdan maraqlı açıqlama

Pişiklə danışmaq bir çox ev heyvanı sahibinə tanış olan vərdişdir.

Bu cür "dialoq" özlüyündə hər hansı psixoloji pozuntu əlaməti hesab edilmir və əksər hallarda insanın stres və narahatlıqla mübarizə aparmasına kömək edir.

Oxu.Az bildirir ki, bu barədə rusiyalı psixiatr Lidiya Kuderinova AİF.ru nəşrinə danışıb.

Onun sözlərinə görə, daxili rahatlığın və mənəvi tarazlığın qorunmasında ev heyvanları ilə qarşılıqlı əlaqə son dərəcə mühüm rol oynayır. Mütəxəssis bildirib ki, insan üçün bu cür "dialoq" güclü emosional rahatlama vasitəsidir:

"Pişiklə ünsiyyət narahatlıq səviyyəsinin azalmasına və stresə davamlılığın artmasına kömək edir. Çünki pişik həmişə sahibini "başa düşəcək" və "dinləyəcək". Bu, insanın içindəki duyğuları dilə gətirməsinin təhlükəsiz üsuludur", - deyə Lidiya Kuderinova qeyd edib.

Həkimlərin fikrincə, pişiklə ünsiyyət yalnız sahibi üçün deyil, həm də heyvanın özü üçün faydalıdır. Psixoterapevt Yuri Vyalba bildirib ki, bu cür söhbətlər ev heyvanında təhlükəsizlik hissini gücləndirir və sahibi ilə emosional əlaqəni möhkəmləndirir. Bu isə xüsusilə tənha yaşayan yaşlı insanlar üçün böyük əhəmiyyət daşıyır.

Mütəxəssislər vurğulayırlar ki, əgər heyvanlarla ünsiyyət tam şəkildə insanlarla danışığı əvəz edirsə, bu halda narahatlığa əsas ola bilər. Digər bütün hallarda isə pişiklə söhbətlər emosional dəstəyin və psixoloji rahatlığın normal və sağlam forması hesab olunur.