20 Yanvardan Zəfərə: Şəhidlər Xiyabanında yaşayan dövlətçilik ruhunun salnaməsi

Prezident İlham Əliyevin Şəhidlər xiyabanını ziyarəti yalnız illərin davam edən ənənəsi deyil, Azərbaycanın dövlətçilik yaddaşının müasir salnaməsinə yazılan növbəti canlı səhifədir. 20 Yanvar faciəsi bir tərəfdən millətin kədəri, digər tərəfdən müstəqilliyin başlanğıc nöqtəsi kimi tarixə həkk olundu. O gecə imperiyanın zirehli texnikası Bakının küçələrinə daxil oldu, lakin xalqın iradəsini qıra bilmədi – bu iradə bu gün müstəqil Azərbaycanın siyasi xəritəsini müəyyən edən əsas dayağa çevrilib.
Bu salnamənin ən mühüm səhifələrindən biri Ulu Öndər Heydər Əliyevin həmin faciədən dərhal sonra Moskvada verdiyi bəyanatlar və beynəlxalq ictimaiyyətə etdiyi çağırışlardır. Məhz o çıxışlar 20 Yanvarın yalnız milli deyil, beynəlxalq hüquqi-siyasi müstəvidə tanıdılması və SSRİ-nin dövlət terroru kimi qiymətləndirilməsi üçün tarixi əhəmiyyət daşıdı. Həmin bəyanatlar Azərbaycan xalqının səsini boğmaq istəyən sistemə qarşı ilk siyasi etirazlardan biri kimi həm cəsarət, həm də məsuliyyət nümunəsi oldu. O çağırışlar sonradan müstəqilliyə gedən yolun ideoloji əsasının formalaşmasına mühüm təsir göstərdi.
İllər keçdikcə Prezident İlham Əliyevin apardığı ardıcıl və uğurlu siyasət 20 Yanvarın qanlı salnaməsini yeni milli qürur səhifələri ilə tamamladı. 44 günlük müharibədən sonra Şəhidlər xiyabanında yanan məşəl təkcə kədərin deyil, həm də haqqın bərpasının simvoluna çevrildi. Azərbaycan torpaqlarını işğaldan azad etməklə o gecənin qurbanlarının mübarizəsinin nəticəsiz qalmadığını bütün dünyaya göstərdi.
Müstəqilliyin bərpası və möhkəmləndirilməsi yolunda Heydər Əliyev siyasi kursu sonradan artıq Prezident İlham Əliyevin liderliyi ilə yeni mərhələyə keçdi. İqtisadi müstəqillik, hərbi güc, diplomatik çeviklik və regional nüfuz kimi dayaqlar dövlətin suverenliyini real məzmuna çevirdi. Bu isə 20 Yanvar faciəsinin salnaməsini kədərdən qələbəyə uzanan milli yol kimi tamamladı.
Bu gün Şəhidlər xiyabanında səssiz qərənfillər altında yatan qəhrəmanlar artıq yalnız faciənin deyil, həm də dövlətçiliyin ilk yolçuları kimi anılır. Prezidentin ziyarəti bu düşüncəni gücləndirir və gələcəyə ötürür: tarix yalnız xatırlanmaq üçün deyil, davam etdirilmək üçün yaşadılır.

Müəllif: 
ARHD.AZ 
Təhsil məsələləri üzrə ekspert Elnur Heydərov Heydər oğlu