Masallıda yaşıllığa doğru addımlar: Göyəçöl yolunda 250 sərv ağacı əkildi

Xezertv.info xəbər veriri ki, Masallı rayonunda ekoloji tarazlığın qorunması və ətraf mühitin daha sağlam şəkildə formalaşdırılması istiqamətində növbəti mühüm addım atılıb. Rayon ərazisində həyata keçirilən yaşıllaşdırma tədbirləri çərçivəsində Masallı Kommunal Təsərrüfat Birliyi (MKTB) tərəfindən Göyəçöl yolunun sol hissəsində 250 ədəd sərv ağacı əkilib. Bu təşəbbüs həm estetik baxımdan, həm də ekoloji cəhətdən ərazinin inkişafına mühüm töhfə verir.

Ağacəkmə aksiyası yolboyu ərazinin daha səliqəli, baxımlı və cəlbedici görünüş almasına xidmət edir. Sərv ağacları uzunömürlü və daimyaşıl olması ilə seçildiyindən, bu ərazi ilboyu yaşıllığını qoruyacaq və təbiətə xüsusi gözəllik qatacaq. Eyni zamanda, sərv ağacları havanın təmizlənməsində, tozun və zərərli maddələrin azalmasında mühüm rol oynayaraq ətraf mühitin sağlamlaşdırılmasına şərait yaradır.

MKTB tərəfindən görülən bu işlər Masallı rayonunda aparılan ekoloji siyasətin tərkib hissəsi olmaqla, yaşıllıq sahələrinin genişləndirilməsi və təbii mühitin qorunması məqsədini daşıyır. Belə təşəbbüslər təkcə bu gün üçün deyil, gələcək nəsillər üçün də daha sağlam və yaşıl mühitin formalaşdırılmasına yönəlib.

Qeyd edək ki, yaşıllaşdırma tədbirləri yalnız ağacəkmə ilə məhdudlaşmır. Əkilən ağaclara mütəmadi qulluq göstərilməsi, suvarma və mühafizə işlərinin aparılması da diqqət mərkəzində saxlanılır. Bu isə yaşıllıq sahələrinin uzunömürlü olmasını təmin edir.

Məlumat üçün bildirək ki, bu istiqamətdə həyata keçirilən tədbirlərin gələcəkdə də davam etdirilməsi nəzərdə tutulur. Masallı rayonunda yaşıllıq sahələrinin artırılması, ekoloji mühitin yaxşılaşdırılması və sakinlər üçün daha komfortlu yaşayış mühitinin yaradılması məqsədilə MKTB tərəfindən ardıcıl və planlı işlər görüləcək.

Fərid Faiqoğlu

AJB-nin üzvü