Polad iradə və dövlətə sədaqət nümunəsi: Azərbaycan Polisi

Azərbaycan Respublikasının təhlükəsizliyinin, ictimai asayişin və hüquqi dövlətçiliyin keşiyində daim ayıq-sayıq dayanan Daxili İşlər Nazirliyinin şəxsi heyətinə, xüsusilə fədakar Azərbaycan polisinə dərin minnətdarlığımı bildirirəm.

Azərbaycan polisi hər zaman döşünü irəli verərək, polad iradə, sarsılmaz mövqe və yüksək peşəkarlıq nümayiş etdirmişdir. Cəmiyyətimizin sabitliyi, vətəndaşların rahatlığı və qanunun aliliyinin təmin olunması naminə gecə-gündüz demədən xidmət göstərən polis əməkdaşları əsl vətənpərvərlik nümunəsidir. Onların xidməti təkcə peşə borcu deyil, həm də xalqa, dövlətə və milli dəyərlərimizə sədaqətin bariz təzahürüdür.

Bu gün Azərbaycan dövləti güclüdürsə, ölkəmizdə ictimai-siyasi sabitlik hökm sürürsə, vətəndaşlar özlərini təhlükəsiz hiss edirsə, bu, məhz hüquq-mühafizə orqanlarının, xüsusən də Daxili İşlər Nazirliyinin fədakar əməkdaşlarının əvəzsiz xidmətlərinin nəticəsidir. Azərbaycan polisi çətin anlarda cəmiyyətin dayağı, təhlükə qarşısında isə sipəri olmuşdur.

Hüquq üzrə fəlsəfə doktoru və hüquq eksperti kimi xüsusi vurğulamaq istərdim ki, qanunun aliliyinin qorunması yalnız normativ aktlarla deyil, onu icra edən insanların vicdanı, əqidəsi və məsuliyyəti ilə ölçülür. Azərbaycan polisi bu məsuliyyəti hər zaman şərəflə daşıyır, dövlətçiliyimizin möhkəmlənməsinə layiqli töhfələr verir.

Bu münasibətlə Daxili İşlər Nazirliyinin rəhbərliyinə və bütün şəxsi heyətinə səmimi təşəkkürümü bildirir, polad iradəli, mərd və qətiyyətli Azərbaycan polisinin hər bir əməkdaşına sağlamlıq, təhlükəsiz xidmət və uğurlar arzulayıram. Dövlətimiz var olduqca, onun keşiyində duran Azərbaycan polisi də daim uca zirvədə olacaqdır.

Hörmətlə,

İsmail Zalov

Hüquq üzrə fəlsəfə doktoru,

Hüquq eksperti,

Arhd.az saytının rəhbəri