“ChatGPT”də fotolarla bağlı mühüm - Yenilik

“OpenAI” şirkəti “ChatGPT” platformasında görüntü generasiyası funksiyasını əhəmiyyətli dərəcədə yeniləyib.

“Qafqazinfo” şirkətin rəsmi bloqunda yayımlanan məlumata istinadən xəbər verir ki, yenilənmiş “ChatGPT Images” sistemi yeni nəsil “GPT Image 1.5” modeli (API versiyası) üzərində qurulub.

Tərtibatçıların bildirdiyinə görə, əsas yeniliklər arasında görüntü yaradılma sürətinin dörd dəfəyə qədər artması və modelin istifadəçi təlimatlarına daha dəqiq əməl etməsi yer alır. “GPT Image 1.5” “Image Arena” reytinqində “Flux.2” və “Gemini 3 Pro Image” kimi rəqibləri geridə qoyaraq birinci pilləyə yüksəlib.

Yenilənmənin əsas üstünlüklərindən biri redaktə məntiqinin dəyişməsidir. Yeni model yalnız istifadəçinin istədiyi detalları dəyişir, işıqlandırmanı, kompozisiyanı və insanların üz cizgilərini qoruyub saxlayır. Bu da üzün təhrif olunmadan saç düzümü və geyim dəyişikliklərini sınaqdan keçirmək kimi praktik foto redaktələrini mümkün edir. “OpenAI” bu funksiyanı “cibdə yaradıcı studiya” kimi təqdim edir.

“GPT Image 1.5” yaradıcı transformasiyalar sahəsində də yeni imkanlar açır. Model şəkilləri orijinalın tanınan xüsusiyyətlərini saxlayaraq poster, reklam vizualları, anime üslubu və digər stilizə edilmiş formatlara çevirə bilir. Eyni zamanda, mətn göstərilməsi xeyli təkmilləşdirilib – əvvəlki versiyaların çətinlik çəkdiyi xırda və sıx mətnlər artıq daha dəqiq əks olunur.

“ChatGPT” interfeysində ayrıca “Images” bölməsi yaradılıb. Bu bölmədə hazır filtrlər, trend sorğular və vizual ideyalar təqdim olunur. İstifadəçilər üçün daha bir rahatlıq isə şəkli yalnız bir dəfə yükləyib, sonrakı generasiyalarda yenidən yükləmədən istifadə etmək imkanıdır.