Azərbaycan Respublikası Gənclər Təşkilatları Milli Şurası tərəfindən Ulu Öndər Heydər Əliyevin anım günü qeyd olunub

Xezertv.info xəbər verir ki, Azərbaycan Respublikası Gənclər Təşkilatları Milli Şurası (NAYORA) Ümummilli Lider Heydər Əliyevin anım günü ilə əlaqədar silsilə tədbirlər keçirib. Tədbirlər müstəqil Azərbaycan dövlətinin qurucusu, uzaqgörən siyasətçi və qüdrətli dövlət xadimi Heydər Əliyevin zəngin irsinin, şərəfli və mənalı ömür yolunun, zəngin dövlətçilik təcrübəsinin və misilsiz xidmətlərinin yad edilməsi məqsədilə keçirilib.

Silsilə tədbirlər çərçivəsində təşkilat rəhbərləri və nümayəndələrinin, Vətən müharibəsi qazilərinin iştirakı ilə Fəxri xiyabanda Ulu Öndərin xatirəsi böyük ehtiramla anılıb.

Tədbirlərin davamı olaraq, Azərbaycan Respublikasının Gənclər Fondunun dəstəyi, Azərbaycan Respublikası Gənclər Təşkilatları Milli Şurası (NAYORA) və "Böyük Qayıdış” Gənclər Təşkilatının birgə təşkilatçılığı ilə Gənclər Təşkilatlarının Resurs Mərkəzində "Heydər Əliyev irsi və müasir Azərbaycan gəncliyi" adlı panel müzakirə təşkil edilib. Tədbirin açılış mərasimində  Azərbaycan Respublikası Gənclər Təşkilatları Milli Şurasının sədri Rafael Hacıbəyli və "Böyük Qayıdış” Gənclər Təşkilatının sədr vəzifəsini müvəqqəti icra edən Hikmət Qaffarov, panel müzakirəsində spiker qismində deputatlar Ceyhun Məmmədov və Məzahir Əfəndiyev iştirak ediblər.

Çıxış edənlər Ulu Öndərin ölkəmizə rəhbərlik etdiyi dövrün mühüm məqamları, milli şüurun inkişafı və Azərbaycanın sosial-iqtisadi, mədəni yüksəlişi üçün həyata keçirilən islahatlardan danışıblar. Həmçinin, Heydər Əliyevin milli düşüncənin formalaşmasına, Azərbaycanın beynəlxalq aləmdə tanınmasına, ordu quruculuğuna və ölkəmizdə ilk ali hərbi məktəbinin yaradılmasına verdiyi misilsiz töhfələrdən bəhs edilib.

Bununla bərabər Ümummilli Lider Heydər Əliyevə həsr olunmuş “Generalın planı” sənədli filmi nümayiş olunub. Filmdə yer alan tarixi hadisələr və qərarlar Ümummilli Liderin dahi siyasətini, uzaqgörən strategiyasını və Azərbaycan dövlətçiliyinin möhkəmləndirilməsi istiqamətində atdığı addımları əyani şəkildə əks etdirir. Gənclər bu film vasitəsilə ölkəmizin inkişaf yolunda Heydər Əliyevin misilsiz xidmətlərini daha dərindən öyrənmək imkanı əldə ediblər.

“Ulu Öndərin əziz xatirəsinə həsr olunmuş film nümayişi, Heydər Əliyev və Azərbaycan dili kitabının müzakirəsi” keçirilib. Tədbirdə AMEA-nın Məhəmməd Füzuli adına Əlyazmalar İnstitutunun böyük elmi işçisi, eyni zamanda kitabın müəllifi Sevinc Dadaşova Ümummilli Lider Heydər Əliyevin zəngin irsi, ana dilimizin inkişafına verdiyi töhfələr və onun Azərbaycan dövlətçilik tarixindəki müstəsna rolu barədə fikirlərini gənclərlə bölüşüb. Ardınca Ulu Öndərin həyat və fəaliyyətini əks etdirən film nümayiş olunub. Film nümayişindən sonra gənclərin fəal iştirakı ilə sual-cavab formatında maraqlı müzakirələr aparılıb.

Fərid Faiq